Jeta ngadalë po kthehet në normalitet në qytetin e Almaty, ku konfliktet kanë qenë më të forta gjatë trazirave në Kazakistan ditët e fundit, transmeton Anadolu Agency.
Sipas selisë së vendosur në Almaty, automjetet e transportit publik kanë filluar sërish të qarkullojnë.
“Supermarketet dhe marketet funksionojnë edhe në Almaty. Dje u hapën 28 degë supermarketesh në të gjitha pjesët e qytetit. Sot u hapën 49 degë të tjera. Ka mjaft produkte ushqimore”, thuhet në deklaratë.
Në qytet operatorët telefonikë kanë rifilluar ofrimin e shërbimeve.
Almaty është qyteti më i madh në Kazakistan me rreth dy milionë banorë.
Përveç kësaj, sipas kanalit televiziv kazak “Khabar-24”, 164 persona kanë humbur jetën gjatë protestave në vend.
Ndërkaq, Ministria e Punëve të Brendshme e Kazakistanit njoftoi të premten se të paktën 18 anëtarë të forcave të sigurisë dhe 26 demonstrues u vranë gjatë trazirave.
Një deklaratë nga Ministria e Brendshme e Kazakistanit tha sot se numri i personave të arrestuar në trazirat e vendit është rritur në 5.135 dhe se numri i anëtarëve të lënduar të forcave të sigurisë ka kaluar mbi 1.300.
