Rastet e dhunës në familje nuk kanë të ndalur. Pothuajse çdo ditë në Policinë e Kosovës raportohen raste të shumta, ku kryesisht viktima janë gratë, të cilat pësojnë nga bashkëshortët e tyre, që shumë herë nuk i denoncojnë në momentin kur përjetojnë dhunën për shkak të frikës. Një rast i tillë ka ndodhur edhe dje, në Veternik të Prishtinës, në orët e pasdites, raporton Gazeta Sinjali.
Sinjali mëson se një grua e ka denoncuar bashkëshortin e saj për dhunën fizike që ia ka shkaktuar, duke e sulmuar me pjata, deri në atë pikë kur përleshja ka eskaluar edhe në kërcënime me vrasje.
Përballë kësaj situate, viktima ka vendosur që zgjidhja më e mirë është që të kërkohet ndihmë nga Policia, por kjo gjë e ka revoltuar të dyshuarin, i cili në momentin që gruaja e tij ka marrë vendim që ta njoftojë Policinë, ai e ka kërcënuar me fjalët se “ka me të vra, edhe vëllezërit ka me t’i mbytë”.
Por ky kërcënim nuk e ka ndalur viktimën, e cila ka arritur që të njoftojë Policinë. Si rezultat i denoncimit, një njësi policore është vënë në veprim dhe ka prangosur burrin e dyshuar, i cili më pas është intervistuar në Polici.
Me urdhër të Prokurorit të Shtetit, i dyshuari është ndaluar për 48 orë dhe ndaj tij kanë nisur hetimet për veprën penale “dhunë në familje”.