Një grup i gjerë bashkëpunëtorësh dhe miq të afërt të ish-Kryeministrit të parë të Republikës së Kosovës, Dr. Bujar Bukoshi, kanë publikuar një letër të përbashkët ngushëllimi dhe kujtimi pas ndarjes së tij nga jeta, shkruan Gazeta Sinjali.
Në këtë letër, Bukoshi përshkruhet si një ndër themeluesit kryesorë të shtetësisë së Kosovës, një burrështetas me parime të forta dhe një nga zërat më të fuqishëm të rezistencës kundër regjimit të Millosheviçit.
Ai njihet për përkushtimin e tij ndaj lirisë, drejtësisë dhe të drejtave të njeriut, si dhe për ndërtimin e marrëdhënieve me aleatët ndërkombëtarë që çuan në çlirimin dhe shtetndërtimin e Kosovës. Letra përfundon me shprehjen e ngushëllimeve më të sinqerta për familjen Bukoshi dhe gjithë popullin shqiptar, duke theksuar se kujtimi për të do të mbetet i gjallë në zemrat e gjithë atyre që e njohën dhe bashkëpunuan me të.
Në emër të bashkëpunëtorëve të tij ishin firmëtarë figura të njohura si Aleksander Meksi, Isa Mustafa, Alfred Serreqi, Genc Pollo dhe të tjerë, duke treguar kështu rëndësinë dhe ndikimin e madh të Dr. Bukoshit në historinë moderne të Kosovës.
Letra e plotë:
Nderim i përjetshëm ish-Kryeministrit Dr. Bujar Bukoshi – misionarit te lirise, patriotit te paepur, një nga vizionarët e themeluesit e pavarësisë së Kosovës, ndër personalitetet më të rëndësishëm të historisë sonë moderne Me pikëllim të thellë morëm lajmin për ndarjen nga jeta të Kryeministrit të parë të Republikës së Kosovës, Dr. Bujar Bukoshi – një ndër themeluesit e shtetësisë së Kosovës perkrah Presidentit Rugova, burrështetas me parime të palëkundura dhe simbol i përpjekjes kombëtare për liri, dinjitet dhe vetëvendosje, së fundi edhe Zv/Kryeministër në qeverinë Thaçi. Në kohët më të rënda ekzistenciale për Kosovën, Dr. Bukoshi qëndroi i palëkundur në rrugën e drejtësisë dhe lirisë, duke shërbyer me dinjitet e guxim të pashoq, u bë zëri i fuqishëm i rezistencës, avokat i palodhur i të drejtave të njeriut. Ai mishëroi si rrallëkush ndërgjegjen politike të qëndresës shqiptare kundër regjimit shtypës të Millosheviçit. Në tërë veprimtarinë e tij, Dr. Bukoshi përfaqësonte modelin e burrështetasit që e shihte funksionin si përgjegjësi të madhe dhe jo si privilegj.
Me vizion të qartë dhe vendosmëri të patundur, ai lidhi Kosovën me aleatët ndërkombëtarë dhe kontribuoi në themelimin e aleancës historike me Perëndimin duke vënë themelet për çlirimin dhe ndërtimin e shtetit të lirë e demokratik të Kosovës. Kontributi i tij si kryeminister në mbështetjen e strukturave shtetformuese ishte jetik dhe do të mbetet pjesë e lavdishme e historisë së Kosovës dhe kombit shqiptar. Në kohëra e rrethana sfiduese, ne patëm nderin të bashkëpunonin ngushtë me këtë udhëheqës të drejtë e të ditur, të guximshëm e vizionar, po edhe të njihnim e të ndanim miqësinë me një njeri me mendim të pavarur, ndershmëri shembullore dhe qartësi të thellë morale, i cili, me veprën dhe aktivitetin e tij u bë simbol i shpresës, kurajos e frymëzimit që shqiptarët të merrnin fatin në duart e tyre për të fituar lirinë. Sot, shqiptaria humbi një ndër bijtë më të ndritur. Por kujtimi për të do të jetojë në zemrat e kujtdo që e ndeshi në rrugën drejt Kosovës së lirë e të pavarur e të cilës ai i kushtoi jetën me përkushtim të rrallë. I shprehim ngushëllimet tona më të sinqerta familjes Bukoshi, miqve të tij, qytetarëve të Kosovës dhe gjithë popullit shqiptar.
Prehu ne paqe, Dr. Bukoshi. Në emër të bashkëpunëtorëve të ngushtë të Kryeministrit Bukoshi: Aleksander Meksi, Isa Mustafa, Alfred Serreqi, Ilaz Ramajli, Xhezair Zaganjori, Enver Hasani, Zef Mazi, Muhamet Bicaj, Genc Pollo, Avdyl Krasniqi, Arian Starova, Halit Muharemi, Mehill Marku, Ferit Hoxha, Esat Myftari, Artur Kuko, Isa Zymberi, Roland Bimo, Beqir Menzelxhiu, Sokol Necaj, Myftar Doci, Besnik Berisha, Albert Bejo
Sinjali – aty ku e vërteta flet para lajmit!