Kreu i Organizatës së Veteranëve të Luftës së UÇK-së, Hysni Gucati, i cili së fundmi u dënua me katër vite e gjysmë burgim, nuk iu është dhënë mundësia që të marrë pjesë në varrimin e babait të tij, Avdullah Gucati, i cili u nda nga jeta të premten.
I biri, Hysniu, ka shprehur dhimbjen dhe mërzinë për të atin, përmes një letre të cilën ua ka dërguar familjarëve të tij.
Letrën e dërguar nga ai, e ka publikuar i biri i tij, Musliu.
Në mes rreshtave emocionues, Hysniu ka shkruar se babain e kishte “shok lufte, shok shpirti e shok lirie”.
Ai madje tha se plumbi që i mbet në trup nga lufta, nuk i la dhimbje sa lajmi për vdekjen e babait.
Postimi i Musli Hysni Gucatit në Facebook:
Letër nga Hysi me rastin e vdekjes së Gjyshit
Babë sot nuk i paske prit shokët si çdo herë tjetër
Me thanë që portreti ytë i priti të dera,
të ajo derë e shpisë që sditi kurrë me u mbyll
Që edhe Kur kulluan gjak plagët bashkë i kemi ndrydhë,
Unë plagët e tua e ti plagët e mia
Duke qesh me thojshe kështu bir e don liria
Shumë herë Shokve ni fjalë jau ke thanë
Ta kisha plumbin që ka Hysi në trup
Kurrë nuk e kisha larguar, kujtim të lirisë e kisha lanë
Eh ta kisha ditë që ky plumb nuk me dha aq dhimbje
Sa dhimbje me dha lajmi që nuk me paske prit
Të kisha shok lufte shok shpirti e shok lirie
Pusho Babë në amshim larg çdo padrejtësie.
29.05.2022.
