Lideri i Aleancës për Ardhmërinë e Kosovës, Ramush Haradinaj, ka reaguar pas takimit të krerëve shtetërorë, Vjosa Osmani e Albin Kurti, me sekretarin amerikan të Shtetit, Anthony Blinken, të mbajtur dje në Washington, raporton Gazeta Sinjali.
Haradinaj përmes një postimi në rrjetin social Facebook, ka thënë se mirëpret mbështetjen e Shteteve të Bashkuara të Amerikës për Kosovën përmes fondit të MCC-së.
Sipas tij, SHBA edhe njëherë ka treguar lidershipin e saj në ndihmën ndaj Kosovës.
“Mirëpres mbështetjen e ShBA-së për Kosovën përmes fondit të MCC-së dhe takimin e delegacionit të Kosovës me Sekretarin Blinken. ShBA, edhe njëherë ka treguar lidershipin e saj në ndihmën ndaj Kosovës, si në aspektin ekonomik ashtu edhe në procesin e dialogut”, shkroi Haradinaj.
Ish kryeministri Haradinaj tha tutje se tani është koha për marrëveshjen finale me njohjen reciproke ndërmjet Kosovës dhe Serbisë, nën udhëheqjen e SHBA-ve.
Por për dallim nga Haradinaj, lidhur me takimin nuk janë deklaruar ende dy liderët tjerë të opozitës, Memli Krasniqi nga Partia Demokratike e Kosovës dhe Lumir Abdixhiku nga Lidhja Demokratike e Kosovës.
Dje Blinken priti në Departamentin e Shtetit presidenten Osmani dhe kryeministrin Kurti me të cilët sipas njoftimit nga DASH-i, diskutoi për partneritetin ndërshtetëror e për dialogun me Serbinë.
SHBA ka përsëritur qëndrimin se dialogu duhet të mbyllet me marrëveshje që ka në qendër njohjen reciproke.
Ndërkaq krerët e Kosovës e kanë quajtur të shkëlqyeshëm e fort të dobishëm takimin me Blinkenin.