Kryetari i Aleancës për Ardhmërinë e Kosovës, Ramush Haradinaj, i është përgjigjur negativisht ftesës së kryeministrit të vendit, Albin Kurtit, për takimin e së mërkurës, temë e të cilit është projekti amerikan për gazsjellësin, raporton Gazeta Sinjali.

Përmes një letre, të cilën e ka bërë publike, Haradinaj i ka thënë Kurtit se ky takim konsultativ është i panevojshëm.

“Tani, konsideroj se zhvillimet që kanë pasuar me Qeverinë Kurti, politizimi dhe njollosja e projektit të Gazit, janë skandaloze, shumë të dëmshme dhe rrezikojnë zbatimin e një prej projekteve më të rëndësishme ekonomike dhe gjeopolitike për vendin si dhe partneritetin me ShBA-në”, thuhet ndër të tjera në letrën që Haradinaj ia ka dërguar kryeministrit Kurti.

I pari i AAK-së ka kritikuar zëvendëskryeministrin Bislimi sepse, sipas tij, ai “e etiketoi dhe e përshkroi Projektin e Gazit si një projekt rus, mohoi vendimet e qeverive të mëparshme dhe dezinformoi publikun me shumë të pavërteta të dëmshme”.

Madje, Haradinaj ka kërkuar nga Kurti që të distancohet publikisht dhe të bëjë thirrje në përgjegjësi Bislimit, në të kundërtën, ai ka thënë se do të vlerësojë se qëndrimet e zëvendëskryeministrit dhe të kryeministrit janë në pajtueshmëri të plotë.

Letra e plotë:

I nderuar kryeministër Kurti,

Në maj të vitit 2019, Qeveria e Republikës së Kosovës, e udhëhequr nga unë si Kryeministër i vendit, miratoi propozimin për të përfituar nga granti i Korporatës së Sfidave të Mijëvjeçarit (MCC) dhe për të mbështetur zhvillimin e Programit Kompakt. Si rezultat, ne krijuam dhe mbështetëm një ekip ekspertësh vendor dhe me ç’rast nënshkrova marrëveshjen e Fondit të Zhvillimit Kompakt (CDF).Si rezultat, programi Kompakt u zhvillua në koordinim të plotë me prioritetet e Qeverisë së Kosovës, agjencisë MCC dhe politikat e Qeverisë Amerikane, dhe pas shumë konsultimeve me të gjithë akterët në sektorin e energjisë, u identifikuan projekte brenda programit për mbështetje për të cilat janë kryer studime të para-fizibilitetit, siç janë: Zhvillimi i Sektorit të Gazit -Diversifikimi i Sektorit të Energjisë; Balancimi i Sistemit të Gjenerimit përmes krijimit të rezervave të energjisë për rrjetin e Transmisionit; Fuqizimi i Sektorit të Energjisë.

Tani, konsideroj se zhvillimet që kanë pasuar me Qeverinë Kurti, politizimi dhe njollosja e projektit të Gazit, janë skandaloze, shumë të dëmshme dhe rrezikojnë zbatimin e një prej projekteve më të rëndësishme ekonomike dhe gjeopolitike për vendin si dhe partneritetin me ShBA-në.

Zëvendëskryeministri Bislimi e etiketoi dhe e përshkroi Projektin e Gazit si një projekt rus, mohoi vendimet e qeverive të mëparshme dhe dezinformoi publikun me shumë të pavërteta të dëmshme. Nga ju Kryminister pres distancimin publik dhe thirrje në përgjegjësi të Zëvendëskryeministrit Bislimi, në të kundërtën e vlerësoj që qëndrimet e Zëvendëskryeministrit dhe të Kryeministrit janë në pajtueshmëri të plotë.

Prandaj, në këto rrethana kërkesën për një takim konsultativ e konsideroj si të panevojshëm. Për më tepër, ne presim që qeveria të marrë vendimet e nevojshme për të mbështetur zhvillimin e projektit të Kompaktit bazuar në studimet e kryera deri më tani nga të gjithë aktorët e përfshirë. Rekomandimet tona janë si më poshtë:

Projekti për Zhvillimin e Sektorit të Gazit të mbështetet nga Qeveria dhe të integrohet në planifikime strategjike.

Revidimi i Strategjisë së Energjisë të mos vonohet dhe të integroj në vetvete zhvillimin e infrastrukturës së gazit dhe kapaciteteve gjeneruese.

Përveç mbështetjes së Kompaktit për këtë projekt, Qeveria e Kosovës duhet të përkushtohet në avancimin e negociatave me BERZH-in dhe BE-në për të siguruar financimin e projektit të gazit.

Qeveria e Kosovës të fillon krijimin e kushteve për krijimin e Operatorit të Sistemit të Transmetimit (OST).

Të mbështetet studimet e mëtejshëm për komponentën e prodhimit të gazit në energji për të adresuar nevojat për rezerva dytësore dhe terciare për të balancuar sistemin e rrjetit të transmisionit.

Jam gjithashtu në dijeni që zbatimi i projekteve me interes strategjik për vendin kërkon kohë dhe qasje në financa, prandaj presim që studimet shtesë që janë duke u zhvilluar të ndihmojnë në matjen e këtyre kërkesave.

Në fund, mbështes përpilimin e Programit Kompakt siç rekomandohet në studimin e para-fizibilitetit dhe shpresoj se rezultatet e fizibilitetit do të vlerësojnë kushtet e tranzicionit të prodhimit të energjisë në Kosovë, nga thëngjilli në gaz, dhe potencialisht në burime të tjera që janë më miqësore për mjedisin.

Sinqerisht, Ramush Haradinaj Kryetar i Aleancës për Ardhmërinë e Kosovës./Gazeta Sinjali/