Kryetari i AAK-së, Ramush Haradinaj do të shkojë nesër në Qeveri për takim me kryeministrin Albin Kurti, por vlerëson se ai është i vonshëm dhe i panevojshëm.
“Takimi vjen vonë. Sa i përket asaj që ka ndodhë në dialog është i panevojshëm”, tha Haradinaj për T7.
Haradinaj tha se për dialogun kanë folur vazhdimisht me të dërguarin e SHBA-së për Ballkanin Perëndimor, Gabriel Escobar.
Ndërsa për deklaratën ironike të Kurtit se e ka marrë malli për opozitën, Haradinaj e pati një përgjigje.
“Është mirë që vendoset një rregull i takimeve të përhershme. S’ka logjikë kryeministri me pasë takime mujore me Vuçiqin e me e marrë malli për Vuçiqin. Sa e ka marrë malli për Kosovën u pa kur nga takimi me Z. Escobar iku te miqtë e tij larg atje dhe mungoi këtu rreth dy javë”, tha ai.
Ish-kryeministri Haradinaj tha se Asociacioni i komunave me shumicë serbe nuk ishte temë në takimin e opozitës me Escobarin.
“Nuk ka qenë pjesë e diskutimeve, mirëpo po hyjmë në fazën finale”, tha Haradinaj.
