Kryetari i Aleancës së Ardhmërisë së Kosovës, Ramush Haradinaj, ka thënë se delegacioni i Kosovës në Shtëpinë e Bardhë në Washington nuk ka fituar ato që ka mundur nga negociatat me Serbinë, pasi kryeministri i Kosovës, Avdullah Hoti dhe koordinatori nacional për dialog, Skender Hyseni kanë pasur komoditet të tepruar.

Haradinaj tha se përveç zbutjes së gjuhës për Ujmanin, Kosova nuk ka fituar asgjë.

“Ka pasur edhe anëtarë të respektuar në delegacion. Por duhet të dimë se përveç zbutjes së gjuhës për Ujmanin nuk kemi fituar asgjë. Besoj se kur Serbia kërkoi tërheqjen për pikën 10 kemi mundur të shtojmë presionin drejt tyre. Kështu negociohet. Edhe përmendja e vetëm pikës së Merdares, është dashur të respektohet. Kjo do të na bëhej më e lehtë po të përmendeshin të gjitha pikat. Hoti dhe Hyseni kanë shkuar me komoditet të tepruar”, tha Haradinaj në Debat Plus.

“Por nuk dua të them se nuk fituam asgjë. Jemi më mirë se kemi qenë. Megjithatë, kjo do të ketë pasojë për brezat e ardhshëm. Isa Mustafa është dashur të japë udhëzime për Hotin. Ai ndoshta i ka thënë se pasi po shkon në Washington është e udhës që mos të na prishë marrëdhëniet me miqtë tonë“, shtoi ai./Gazeta Sinjali/