Ish-komandanti i Ushtrisë Çlirimtare të Kosovës, Ramush Haradinaj, ka reaguar pas dënimit të Nasim Haradinajt dhe Hysni Gucati nga Dhomat e Specializuara të Kosovës, të cilët u dënuan me nga katër vite e gjysmë burgim.
Haradinaj, ndër të tjerash ka shkruar edhe ca fjalë për paraardhësit e Nasim Haradinajt, të cilët i përkufizon si luftëtarë të denjë për të drejtat e popullit shqiptar, duke thënë se kjo familje në vazhdimësi është përballur me sfida të llojit të tillë.
“Do i them pak fjalë për Nasimin. Stërgjyshi i tij, Xhemajli i parë, pjesëmarrës në shumë luftëra kundër pushtuesve u vra në Gjakovë te kulla e Abdullah Pashë Drenit, në mbrojtje të Lidhjes së Prizrenit. Gjyshi i tij, Xhemali i dytë, pjesëmarrës në të gjitha luftërat për liri. Bashkëshortja e tij, gjyshja e Nasimit, ishte bijë e Tishukëve, familje e njohur atdhetare në Dukagjin e Kosovë“, ka shkruar Haradinaj.
I pari i Aleancës ka vazhduar tutje duke thënë: “Babai i tij, Smajl Haradinaj, luftëtar i paepur për të drejtën e shqiptarëve, pjesëmarrës në lëvizjet antijugosllave dhe për bashkim me Shqipërinë, i burgosur politik mbi 20 vjet. Nana Myzaqet, vëllau Naimi, motrat Shqipja e Naimja, bashkëshortja Xhejlanja, e veçanërisht vëllai i vogël Agroni që vuan nga një sëmundje e rëndë, e kuptojnë dhe e ndjejnë peshën e vendimit të sotëm, sepse nuk janë brezi i parë që përballohen me sfida të tilla“.
Haradinaj iu drejtua bashkëluftëtarëve të tij duke iu thënë “qëndroni të fortë” dhe duke shtuar se “lufta për liri e shtet vazhdon”.
