Mundësia që Pep Guardiola të marrë drejtimin e Kombëtares së Italisë vazhdon të jetë një nga temat kryesore në futbollin italian, por kërkesat financiare të trajnerit spanjoll mund të komplikojnë marrëveshjen.
Presidenti i Federatës Italiane të Futbollit, Gabriele Gravina, ka konfirmuar se ka pasur kontakte me Guardiolën, duke lënë të hapur mundësinë që për të të bëhen edhe përjashtime financiare.
Megjithatë, sipas raportimeve të mediave italiane, kërkesa e trajnerit katalanas ka befasuar drejtuesit e federatës. Guardiola dyshohet se kërkon rreth 20 milionë euro në vit për të marrë drejtimin e “Azzurrëve”, një shumë dukshëm më e lartë se oferta fillestare e planifikuar nga Italia.
Kjo kërkesë, sipas disa raportimeve, mund të jetë edhe një mënyrë për ta bërë marrëveshjen më të vështirë dhe për të shmangur një angazhim të menjëhershëm.
Guardiola, pas një periudhe të gjatë në krye të Manchester Cityt, ka deklaruar më herët se dëshiron të marrë një pushim përpara një projekti të ri, por emri i tij mbetet prioritet për drejtuesit italianë.
Në rast se negociatat dështojnë, Italia ka alternativa të tjera në listë, me Andrea Pirlon, Roberto Mancinin dhe Antonio Conten si emra të mundshëm për postin e selektorit.
Sinjali – aty ku e vërteta flet para lajmit!