Grupit të ekspertëve për dizajnimin e parimeve udhëheqëse, skenarët dhe elementet e reformës së Vetingut në sistemin e Drejtësisë iu vazhdua mandati deri më 10 korrik.
Ky vendim u mor në mbledhjen e mbrëmshme të Qeverisë në detyrë, shkruan Gazeta Sinjali.
Ministrja në detyrë e Drejtësisë, Albulena Haxhiu, tha se për shkak të përballjes me pandeminë, Grupi i ekspertëve për dizajnimin e parimeve udhëheqëse, skenarët dhe elementet e reformës së Vetingut në sistemin e drejtësisë, e ka pasur të pamundur të përmbyllë raportin me propozimet e tyre për këtë çështje.
“Duke pasur parasysh rëndësinë e kësaj reforme, në përputhje me programin tonë, në mbledhjen e djeshme të Qeverisë, Grupit të ekspertëve iu vazhdua mandati deri më 10 korrik. Anëtarëve të Grupit, i uroj punë të mbarë dhe i falenderoj për punën që po bëjnë”, shkroi Haxhiu në një postim në Facebook./Gazeta Sinjali/