image Glauk Konjufca tregon se a dëshiron të bëhet ministër

Kosovë

Qeverisje/ Glauk Konjufca tregon se a dëshiron të bëhet ministër

news image

Nënkryetari i Lëvizjes Vetëvendosje, Glauk Konjufca, po e konsideron si tejët të afërt arritjen e një koalicioni me Lidhjen Demokratike të Kosovës. Ai ka thënë se mes dy partive kanë mbetur edhe një apo dy takime mes partive pasi që sipas tij 90% e programit është përafruar.

Ai ka paralajmëruar se në ditët në vazhdim do të vendoset edhe për postet ministrore, teksa ka theksuar se posti i kryeministrit s’është për diskutim.

“Në ditët në vazhdim do të vendosim edhe për postet ministrore. Kryeministri është i pakalkulueshëm. Ne patëm pajtueshmëri xhentëlmene, cili del i pari me vota, e merr kryeministrin. Kjo pajtueshmëri është vendosur me votë”, ka deklaruar ai në RTV21.

“Për kryeministrin s’ka kundërpesha, e as kalkulime”, ka deklaruar Konjufca, teksa i është përgjigjur, tërthorazi, nënkryetares së LDK-së, Vjosa Osmani, e cila ka deklaruar se posti i kryeministrit ka vlerë të barabartë me të 3 apo 4 ministrave.

“Kryeministri ka qenë plebishit. Kandidatët në mënyrë të ndershme janë pajtuar që fituesi i zgjedhjeve të jetë kryeministër. Nuk është shume i vogël dallimi mes LDK-së dhe VV-së. Qytetari më shume i besoi VV-së, për arsye të cilat s’po dua t’i permend. Principet e qeverisjes janë që VV do ta ketë kryeministrin. Nuk kemi folur ende për principin e ndarjes, s’mund të them që VV-ja kërkon më shumë ministri, e as më pak. Se si do t’i ndajmë përgjegjësitë, do të flasin liderët. VV-ja ka përmendur edhe ministri të caktuara, normalisht që i synon (Ministrinë e Financave, Ministrinë e Brendshme, Ministrinë e Drejtësisë), por jemi të vetëdijshëm që në një proces negociator, subjekti mund edhe të mos i marrë gjithë ato që dëshiron. Negociator i bie që s’mund t’i marrësh 100 për qind ato që dëshiron”, ka deklaruar Konjufca.

I pyetur se a do të bëhet personalisht pjesë e qeverisë, Konjufca ka thënë se nuk është i interesuar të marrë post ministror.

“Unë nuk synoj asnjë post ministror. Sa i përket vullnetit tim personal, nuk jam për ndonjë post ministror. Kjo i përket VV-së, sepse ne hyjmë në këto angazhime për interes të përgjithshëm. Nëse do të jem i domosdoshëm për kryeministrin e ardhshëm, pa te cilin nuk bën, vetëm për këtë do të isha përfshirë, në çfarëdo kapaciteti që më kërkohet”, është përgjigjur ai.

Konjufca po ashtu ka thënë se për zëvendëskryeministrat do të vendosin Isa Mustafa dhe Albin Kurti./Gazeta Sinjali/