Kryeparlamentari, Glauk Konjufca në fjalimin e tij në seancën solemne të Kuvendit të Kosovës për 14-vjetorin e pavarësisë së Kosovës, ka thënë se përkulet para luftës së Ushtrisë Çlirimtare të Kosovës.
Po ashtu, Konjufca tha se do të kujdesen që të përmbushin amanetin e të rënëve.
“Çdo njëri nga ne më 17 shkurt kaplohemi nga një gjendje e veçantë shpirtërore e cila e mishëron krenarinë me entuziazëm. Krenaria na vjen si sublimim i rrugës së gjatë e të mundimshme të popullit tonë për liri, kurse entuziazmi si vetëdije për arritjet e deritashme dhe si optimizëm për të ardhmen. Sot duke e kujtuar 14 vjetorin e shpalljes së pavarësisë para së gjithash i nderojmë dëshmorët e luftës për liri që nuk e kursyen as jetën për mëvetësinë e shtetit tonë. Përkulemi para sakrificës së tyre dhe të luftës së shenjtë dhe të lavdishme të Ushtrisë Çlirimtare të Kosovës”, ka deklaruar ai.
Sipas Konjufcës, asnjë gjykatë nuk mund ta shtrembërojë luftën e UÇK-së.
“Lufta jonë ishte e drejtë dhe e domosdoshme, ajo ishte e drejtuar kundër okupatorit për ndaljen e gjenocidit dhe për lirinë tonë të përbashkët. Asnjë gjykatë në botë nuk mund ta shtrembërojë, a ta ndryshojë këtë të vërtetë që është e vërteta e jetës tonë. Le t’i nderojmë po ashtu ato gra dhe ata burra të cilët me mençurinë dhe guximin e tyre na drejtuan dhe orientuan që udhëkryqet e rrezikshme të historisë t’i kapërcejmë pa përplasje të brendshme e fatale”, tha Konjufca.
