Gjykata e Apelit i ka dënuar sot gjashtë persona me 37 vjet burgim për krim të organizuar.

Departamenti Special i Gjykatës së Apelit përmes një komunikate të dërguar për media, ka bërë të ditur se u ka vërtetuar dënimet me burgim të akuzuarve me inicialet: A.L., R.H., F.G., F.A., F.S dhe Z.B.

Më tej thuhet se në këtë mënyrë, kjo gjykatë e ka lënë në fuqi, pjesshëm, aktgjykimin e Gjykatës Themelore në Gjilan, të datës 16.07.2019, sipas të cilit tre të akuzuarit e parë ishin shpallur fajtor për shkak të veprës penale “Pjesëmarrje ose organizim i grupit kriminal të organizuar” nga neni 238 par.1 lidhur me veprën penale “Blerje, posedim, shpërndarje dhe shitje e pa autorizuar e narkotikëve, substancave psikotrope dhe analoge” dhe ishin gjykuar.

“A.L. dhe R.H më nga 11 vjet burgim, ndërsa i akuzuari F.G me 8 vjet burgim. I akuzuari F.A, ishte shpallur fajtor për shkak të veprës penale ‘Blerje, posedim, shpërndarje dhe shitje e pa autorizuar e narkotikeve, substancave psikotrope dhe analoge’ dhe ishte dënuar më 4 vjet burgim. Ndërkaq të akuzuarit F.S. dhe Z.B ishin shpallur fajtor, secili për shkak të veprës penale ‘Dhënie e ndihmës në kryerjen e veprës penale’ dhe ishin dënuar, i pari më 2 vjet burgim, ndërsa i dyti më 1 vjet burgim”, thuhet në komunikatë.

Kolegji i Apelit, e ka aprovuar ankesën e Prokurorisë Speciale, dhe sipas detyrës zyrtare, lidhur më dy të akuzuarit tjerë të këtij rasti G. A dhe L.N., dhe çështja është kthyer në rigjykim dhe rivendosje. Gjithashtu më aprovimin e ankesës së prokurorisë, është konfiskuar automjeti BMË X5, të cilin e ka përdor i akuzuari A.L. për kryerjen e veprës penale.

Kolegji i Apelit i ka aprovuar pjesshëm edhe ankesat e mbrojtësve të pandehurve A.L., R.H. F.G. dhe F.A. ashtu që iu është zbutur dënimi me gjobë.

Në çështje tjera aktgjykimi i gjykatës së shkallës së parë, ka ngelur i pa ndryshuar.