image Gjykata cakton masën e paraburgimit për zyrtarët komunalë në Prizren që u arrestuan dy ditë më parë

Drejtësi

Gjykata cakton masën e paraburgimit për zyrtarët komunalë në Prizren që u arrestuan dy ditë më parë

news image

Dy ditë më parë Departamenti i Krimeve Ekonomike në Prizren, ka arrestuar në një aksion 5 zyrtarë të kësaj komune, nën dyshimin se kanë keqpërdorur pozitën apo autoritetin zyrtar.

Ndaj të arrestuarve që siç ka raportuar Sinjali: 1.Cengiz Curciali, që mbante pozitën e Koordiantorit në zyrë; 2. Idbalka RAMA, kryetare e komisionit; 3. Raim DZAFERI, anëtar i komisionit; 4. Asim IMERI, anëtar i komisionit vlerësues si dhe 5.Shaban ADEMAJ, përgjegjës i një Operatori Ekonomik të përfshirë në keqpërdorim, Gjykata Themelore në Prizren ka caktuar masën e paraburgimit prej një muaji ndaj pesë zyrtarëve komunalë të Prizrenit, të cilët dyshohen për “Keqpërdorim të pozitës apo autoritetit zyrtar” dhe “Falsifikim të dokumentit zyrtar”.

Ata dyshohet se i kanë shkaktuar dëm buxhetit të komunës për 13 mijë euro.

“Të pandehurit si persona zyrtar duke shfrytëzuar detyrën apo autoritetin zyrtar i tejkalojnë kompetencat e tyre ose nuk i përmbushin detyrat zyrtare të tyre me qëllim që të përfitojnë çfarëdo dobie për vete ose për personin tjetrin apo që tu shkaktojnë dëm personave tjerë, në atë mënyrë që nga fillimi i muajit dhjetor 2021 e deri me datë 25.07.2022, i pandehuri C.C., ish-Koordinator në Zyrën për Komunitet dhe Kthim në Komunën e Prizrenit, e pandehura I.R., Menaxhere e Zyrës për Komunitet dhe Kthime në Komunën e Prizrenit, i pandehuri A.I., Zyrtar për të drejtat dhe integrimin e komuniteteve në Komunën e Prizrenit, i pandehuri R.D., Zyrtar për të drejtat dhe integrimin e komuniteteve në Komunën e Prizrenit dhe i pandehuri Sh.A., Drejtor i Ndërmarrjes “B-A.” Sh.P.K, me seli në fshatin Zhur-Komuna e Prizrenit, bazuar në tenderin e shpallur nga Autoriteti Kontraktues – Komuna e Prizrenit, “Furnizimi me material ndërtimor për rindërtimin e shtëpive të familjeve skamnore dhe rasteve sociale të komuniteteve minoritare në Komunën e Prizrenit”, përfituesve për furnizim me material ndërtimor-të dëmtuarve B.R., A.K., L.U., etj, nuk ua dorëzojnë në tërësi materialin ndërtimor ashtu siç ka qenë e paraparë në bazë të tenderit, me ç ’rast buxhetit të Komunës së Prizrenit i është shkaktuar dëm material në shumë prej 13,283.00 Euro”, thuhet në njoftim.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.

/GazetaSinjali/