image Gjukanoviq: Vuçiqi si Millosheviqi, po e shkatërron stabilitetin e rajonit

Rajon

Gjukanoviq: Vuçiqi si Millosheviqi, po e shkatërron stabilitetin e rajonit

news image

Presidenti i Malit të Zi, Milo Gjukanoviq, ka vlerësuar sot se presidenti i Serbisë, Aleksander Vuçiq, po përpiqet të prezantohet me projektin e Ballkanit të Hapur si faktor i bashkëpunimit rajonal dhe se ai në fakt është “një njeri që e shkatërron sovranitetin e vendeve fqinje dhe stabilitetin rajonal”.

Gjukanoviq tha se alternativat rajonale janë gjithmonë të mirëseardhura “sepse ato janë një terren testimi për bashkëpunim”, por se Mali i Zi e ka një rezervë për “Ballkanin e Hapur”.

Ai tha se ka edhe nisma të tjera si Procesi i Berlinit, e cila “hap perspektiva të rëndësishme për lidhjen e rajonit dhe lidhjet infrastrukturore me BE-në”.

Një arsye tjetër pse ai e shikon me rezerva nismën e Ballkanit të Hapur është se “ajo ofrohet si një lloj alternativë ndaj Bashkimit Evropian”, dhe “jokredibiliteti i disa prej personave që e promovojnë këtë nismë”.

Në këtë kontekst, Gjukanoviq tha se ai e ka fjalën kryesisht për Vuçiqin.

Gjukanoviq thotë se Vuçiq, “i cili po përpiqet të paraqitet si faktor i bashkëpunimit rajonal, është i njëjti njeri që po e shkatërron sovranitetin e vendeve fqinje dhe po e shkatërron stabilitetin e rajonit”, tha ai në një intervistë për televizionin MCN.

/GazetaSinjali/