Gjermania ka shënuar një rekord të ri në vitin 2025 sa i përket natyralizimeve, me 332,500 persona që fituan shtetësinë gjermane, sipas të dhënave të publikuara nga Zyra Federale e Statistikave.
Shifra paraqet një rritje prej 14 për qind krahasuar me vitin paraprak dhe konsiderohet niveli më i lartë i regjistruar deri më tani.
Sirianët përbënin grupin më të madh të qytetarëve të rinj gjermanë, me 20 për qind të totalit të natyralizimeve. Pas tyre renditen qytetarët turq me 10 për qind dhe rusët me 6 për qind.
Ndërkohë, një rritje e ndjeshme është regjistruar edhe te shqiptarët, ku numri i natyralizimeve u rrit me 97 për qind, duke arritur në rreth 6,100 persona. Rritje të larta janë shënuar gjithashtu te qytetarët boshnjakë dhe amerikanë.
Ekspertët e lidhin këtë trend me reformën e ligjit të shtetësisë që hyri në fuqi në vitin 2024, e cila lejoi shtetësinë e dyfishtë si standard dhe uli periudhën e kërkuar të qëndrimit nga tetë në pesë vjet.
Debati politik rreth natyralizimeve mbetet i ndezur në Gjermani. Ndërsa partitë e djathta kërkojnë rregulla më të ashpra, përfaqësues të qeverisë argumentojnë se qytetarët e rinj kontribuojnë në tregun e punës, sistemin social dhe integrimin e shoqërisë.
Autoritetet gjermane paralajmërojnë se në vitet e ardhshme numri i aplikimeve mund të rritet edhe më shumë, veçanërisht nga refugjatët ukrainas që plotësojnë kushtet për të fituar shtetësinë gjermane.
Sinjali – aty ku e vërteta flet para lajmit!