Një operacion i koordinuar mes autoriteteve shqiptare dhe atyre të Emirateve të Bashkuara Arabe ka mundësuar ekstradimin e gjashtë shtetasve shqiptarë të shpallur në kërkim ndërkombëtar.
Sipas njoftimit të Policisë së Shtetit, të arrestuarit në Dubai pritet të mbërrijnë sot në Shqipëri, ku do të përballen me procedurat ligjore për veprat penale që u atribuohen.
Katër prej tyre, K.Q. (44 vjeç), Sh.K. (44 vjeç), A.P. (38 vjeç) dhe D.P. (39 vjeç), dyshohen për përfshirje në trafik narkotikësh dhe pastrim parash, aktivitete që sipas hetimeve janë zhvilluar në kuadër të grupeve të strukturuara kriminale.
Ndërkohë, I.L. (30 vjeç) akuzohet për pastrim të produkteve të veprës penale, gjithashtu në kuadër të një organizate kriminale, ndërsa M.C. (34 vjeç) kërkohej nga drejtësia shqiptare për mashtrim kompjuterik të kryer në bashkëpunim me grup të strukturuar kriminal.
Autoritetet shqiptare e kanë cilësuar këtë ekstradim si një tjetër rezultat të bashkëpunimit ndërkombëtar në luftën kundër krimit të organizuar dhe kapjen e personave që tentojnë t’i shmangen drejtësisë duke u strehuar jashtë vendit.
Sinjali – aty ku e vërteta flet para lajmit!