Policia në Ferizaj ka intensifikuar kontrollet në rrugët e rajonit, duke ndëshkuar tre drejtues automjetesh për shkelje serioze të rregullave të trafikut, në kuadër të masave për rritjen e sigurisë rrugore dhe parandalimin e aksidenteve.
Sipas njoftimit zyrtar, një nga rastet më të rënda është regjistruar në rrugën magjistrale në fshatin Rakaj, ku një shofer 28-vjeçar me inicialet N.B. është kapur duke drejtuar automjetin me shpejtësi 161 km/h në zonë ku kufizimi ishte vetëm 50 km/h.
Policia ka bërë të ditur se ndaj tij janë shqiptuar masa të ashpra ndëshkuese.
“Për këtë kundërvajtje janë shqiptuar gjobë prej 500 euro, 5 pikë negative dhe masë mbrojtëse – ndalim i drejtimit të mjetit për 6 muaj”, thuhet në njoftim.
Në një rast tjetër, një shofer 23-vjeçar me inicialet D.Ç. është përballur me masën e heqjes së patentë-shoferit për 12 muaj, pasi kishte grumbulluar 10 pikë negative brenda periudhës gusht 2025 – qershor 2026, si pasojë e shkeljeve të përsëritura në trafik.
Ndërkohë, në rrugën “Enver Topalli” në Ferizaj, policia ka ndaluar një tjetër shofer 23-vjeçar me inicialet A.H., i cili kishte kryer tejkalim në vijë të plotë dhe në vendkalim për këmbësorë, duke rrezikuar sigurinë e tyre.
“Ndaj tij janë shqiptuar gjobë prej 200 euro, 2 pikë negative dhe masë mbrojtëse – ndalim i drejtimit të mjetit për 3 muaj”, bëhet e ditur në njoftim.
Ky rast është raportuar nga qytetarët përmes platformës digjitale “Lajmëro Policinë”.
Policia e Kosovës ka theksuar se kontrollet do të vazhdojnë edhe në ditët në vijim, me qëllim rritjen e sigurisë rrugore dhe respektimin e rregullave të komunikacionit.
Autoritetet u kanë bërë thirrje qytetarëve që të raportojnë shkeljet në trafik përmes linjave zyrtare dhe aplikacionit “Lajmëro Policinë”, duke garantuar konfidencialitet të plotë.
Sinjali – aty ku e vërteta flet para lajmit!