Ushtria Çlirimtare e Kosovës nuk ka vrarë asnjë njeri të paarmatosur, asnjë fëmijë, asnjë grua. UÇK nuk lufton kundër popullit serb që jeton në Serbi. Kështu thoshte për BBC-në një nga figurat kryesore të UÇK-së, Fehmi Lladrovci, që ra dëshmor.

“Gjithqysh, edhe me dëshirën më të madhe”, kishte thënë Lladrovci kur ishte pyetur nëse do të jepte jetën për liri.

“Më e shtrenjtë është liria se vetë jeta” u përgjigj me buzëqeshje Fehmi Lladrovci, duke shtuar se “të gjithë ushtarët e Ushtrisë Çlirimtare të Kosovës janë të vetëdijshëm se pushkën e kanë marrë me vdekë për lirinë e Kosovës dhe asnjë nuk kursejnë, ai do të ishte fati im më i madh i jetës”, kishte thënë Fehmi Lladrovci në intervistën dhënë gazetarit të BBC-së, Vaughan Smith në vitin 1998.

Lladrovci kishte deklaruar se ushtarët e UÇK-së nuk kanë marrë armët në duar për të luftuar kundër popullatës serbe, por kundër regjimit të Millosheviqit.

“Le të argumentojnë serbët vetëm një rast terrorizmit që e ka bërë Ushtria Çlirimtare e Kosovës. Ndërsa ne kemi me mijëra që falanga serbe ka bërë terror mbi popullin shqiptar. Le ta tregojnë një njeri të pafajshëm që është vrarë nga Ushtria Çlirimtare e Kosovës, një njeri të paarmatosur, një fëmijë apo një grua kudoqoftë në territorin e Kosovës. Dhe, ne armët nuk i kemi marrë për të luftuar kundër popullatës serbe që jeton në Kosovë, por kundër regjimit çetnik dhe kundër forcave policore dhe ushtarake që janë në Kosovë”, kishte thënë Lladrovci.

Lladrovci kishte deklaruar se UÇK nuk pajtohet me asnjë zgjidhje tjetër, përveç pavarësisë së Kosovës.

“Ne dëshirojmë çlirimin definitiv të Kosovës. Ushtria Çlirimtare e Kosovës nuk pajtohet me asnjë zgjidhje përveç pavarësisë së plotë të Kosovës. Jemi të gatshëm për bisedime me Serbinë vetëm për kufij dhe për asgjë tjetër”, kishte thënë Lladrovci për BBC.

Në këtë intervistë, Lladrovci kishte thënë se lufta ishte e domosdoshme.

“Ne nuk i kemi marrë armët në dorë se kemi dëshirë ose jemi të sëmurë me luftu, por është domosdoshmëri pa të cilën nuk kupton askush, as Evropa e as Amerika, prandaj është domosdoshmëri e kohës”, kishte deklaruar Lladrovci.

Ai kishte thënë se rinia serbe nuk është e interesuar për luftë në Kosovë, por Millosheviqi i kishte paguar dhe i kishte frymëzuar me urrejtje ndaj shqiptarëve.

“Ushtria jugosllave ka qenë prej kohësh e kyçur në këtë luftë dhe nuk ka asnjë mundësi të luftojë për arsye se janë të gjithë të rinj dhe nuk kanë motiv për luftë, por këta janë të gjithë njerëz të paguar dhe njerëz që me vite Millosheviqi i ka frymëzuar me shovinizmin më të madh dhe me urrejtjen më të madhe ndaj shqiptarëve. Jam plotësisht i bindur se rinia serbe nuk do të jetë e gatshme të luftojë në Kosovë”, thoshte Lladrovci.

Fahmi Lladrovci ra dëshmor më 22 shtator të vitit 1998, katër muaj pas intervistës që dha për BBC./Gazeta Sinjali/