Një i dënuar gabimisht për vrasje dhe i burgosur për 26 vjet në Karolinen e Veriut është falur plotësisht nga guvernatori.

Dontae Sharpe që nga viti 1994 kur ishte arrestuar kishte luftuar për ta dëshmuar pafajësinë e vet.

Ai u lirua nga burgu në gusht të vitit 2019, shkruan BBC, përcjell Gazeta Sinjali.

“Emri i familjes sime është pastruar. Është një barrë që është hequr nga krahët e mi dhe nga krahët e familjes sime”, tha ai para gazetarëve të premten.

Lajmi për faljen e këtij personi erdhi pas një dokumentari të BBC-së për dështimin e drejtësisë në këtë rast. Rrëfimi për Sharpe-n vuri në pah se si mund të nevojiten vjet për të marrë falje të plotë, pasi një person të jetë shfajësuar dhe ta ketë fituar lirinë.

Guvernatori Roy Cooper përmes një deklarate tha se e ka rishikuar me kujdes rastin dhe se ata që janë dënuar gabimisht si Sharpe meritojnë që drejtësia t’u njihet plotësisht dhe publikisht.

Pas vendimit për falje të plotë, Sharpe do të ketë mundësi që të paraqesë kërkesë për dëmshpërblim nga ky shtet i ShBA-së.

“Liria ime ende nuk është e kompletuar përderisa ka njerëz gabimisht në burg, gabimisht të dënuar dhe njerëz që presin për falje. Kam qenë atje brenda dhe e di që ka burra që janë të pafajshëm dhe e di që sistemi ynë është i prishur dhe duhet të ndryshohet”, tha Sharpe. /GazetaSinjali/