Grave zakonisht u kërkohet të fillojnë të bëjnë mamografi të rregullta në moshën 40-vjeçare, por disa mund të kenë nevojë të fillojnë edhe më shpejt, thonë ekspertët.
Faktorët specifikë që rrisin rrezikun e kancerit të hershëm të gjirit mund t’i shtyjnë gratë e reja të konsiderojnë ekzaminimin më herët, tha Dr. Michele Blackwood, drejtoreshë e kirurgjisë së gjirit dhe shëndetit onkologjik të grave në Institutin e Kancerit RWJBarnabas Health dhe Rutgers.
“Nëse identifikoheni me ndonjë nga këta faktorë, është e rëndësishme të diskutoni opsionet tuaja të shqyrtimit me ofruesin tuaj të kujdesit shëndetësor”, tha Blackwood.
“Ata mund t’ju ndihmojnë të vendosni nëse marrja e një mamografie në një moshë më të re është zgjidhja e duhur për ju”, shtoi ajo.
Këto përfshijnë:
Një histori familjare e kancerit të gjirit.
“Nëse keni një të afërm të ngushtë – nënë, motër ose vajzë – e cila është diagnostikuar me kancer gjiri, veçanërisht në një moshë të re, kjo mund të rrisë ndjeshëm rrezikun e zhvillimit të sëmundjes”, tha Blackwood.
Mutacione gjenetike si BRCA1 ose BRCA2.
“Nëse keni një histori familjare të këtyre mutacioneve të gjeneve ose sindromeve të tjera të kancerit të trashëguar, mund t’ju duhet të filloni ekzaminimet shumë më herët”, tha Blackwood.
Ind i dendur i gjirit.
“Gratë me inde të dendura të gjirit jo vetëm që kanë një rrezik më të lartë të kancerit të gjirit, por indet e dendura gjithashtu mund ta bëjnë më të vështirë zbulimin e tumoreve në një mamografi standarde”, tha ajo.
Ekspozimi ndaj rrezatimit në moshë të re.
“Nëse i keni nënshtruar trajtimit me rrezatim në gjoks në një moshë të re, si për trajtimin e një kanceri tjetër, mund të jeni në rrezik të shtuar për zhvillimin e kancerit të gjirit më herët në jetë”, u shpreh tutje.
Zgjedhje jo të shëndetshme të stilit të jetesës.
“Megjithëse faktorët e stilit të jetesës si pirja e duhanit, obeziteti dhe përdorimi i tepruar i alkoolit janë më shpesh të lidhur me rrezikun e përgjithshëm të kancerit më vonë në jetë, ata ende mund të ndikojnë në rrezikun e kancerit të gjirit në moshat më të reja”, përfundoi Blackwood.