Një vdekje e dyshimtë është raportuar pasditen e së enjtes në Kamenicë, ku një burrë ka humbur jetën derisa ishte duke punuar në rregullimin e varrezave të komunitetit serb.
Viktima është Avdil Rexhepi, i cili sipas informacioneve të para, ka qenë duke punuar së bashku me disa persona të tjerë në varrezat e serbëve në Kamenicë, kur papritur është rrëzuar në tokë pa shenja jete.
Rasti është raportuar rreth orës 17:40 nga Qendra Kryesore e Mjekësisë Familjare në Kamenicë, pasi ambulanca kishte transportuar viktimën në gjendje pa shenja jete.
Menjëherë pas pranimit të informacionit, njësitet policore kanë dalë në vendin e ngjarjes dhe në QKMF për sigurimin e vendit dhe kryerjen e veprimeve të nevojshme procedurale.
Katër dëshmitarë që ndodheshin në vendin e ngjarjes kanë deklaruar se Avdil Rexhepi ishte duke punuar me ta në rregullimin e varrezave dhe se për një moment ishte rrëzuar pa ndjenja.
Lidhur me rastin janë njoftuar hetuesit kompetentë dhe Prokurori i Krimeve të Rënda, të cilët kanë nisur veprimet hetimore për sqarimin e rrethanave të vdekjes.
Shkaqet e sakta të vdekjes pritet të përcaktohen pas procedurave dhe ekzaminimeve të mëtejme mjeko-ligjore.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
Sinjali – aty ku e vërteta flet para lajmit!