Vajzat dhe gratë po vazhdojnë të jenë viktimat më të shpeshta të dhunës në familje, ngacmimeve dhe sulmeve seksuale. Një rast i tillë ka ndodhur edhe në orët e para të mëngjesit të sotëm në kryeqytet, ku një vajzë e re është përballur me momente frike dhe pasigurie, pasi u përndoq dhe u sulmua seksualisht nga një person i panjohur.

Sinjali mëson nga burime të sigurta brenda Policisë se ngjarja ka ndodhur rreth orës 00:30 në rrugën “Sylejman Vokshi”, në Prishtinë.

Viktima, R.Z., rreth 22-vjeçare, ishte duke ecur vetëm, kur vuri re se po ndiqej nga një burrë i panjohur. Ai i është afruar dhe e ka prekur në mënyrë të papërshtatshme në pjesën e pasme të trupit.

E tronditur nga ngjarja, vajza ka reaguar menjëherë duke e shtyrë të dyshuarin dhe është larguar me shpejtësi në drejtim të lokalit “Tirana” në rrugën “2 Korriku”, ku kishte planifikuar të takohej me disa shoqe. Por përndjekja nuk përfundoi aty – burri e ndoqi edhe brenda lokalit dhe u largua vetëm pasi pa që ajo ishte ulur në shoqëri të të tjerëve.

Pas raportimit të rastit, njësitet policore kanë ndërmarrë veprimet e nevojshme. I dyshuari është identifikuar si Ghaith Abu Saed, rreth 47-vjeçar, shtetas i huaj, i cili është ndaluar për 48 orë me urdhër të Prokurorit të Shtetit.

Burimet konfirmojnë se nuk është zhvilluar intervistimi i tij, për shkak të pamundësisë për të siguruar përkthyes të autorizuar në momentin e ndërhyrjes. Për këtë arsye, ai është dërguar në qendrën e ndalimit, ku do të qëndrojë deri në marrjen e deklaratës dhe përpilimin e kallëzimit penal për veprën “Sulm seksual”.

Hetimet janë në zhvillim dhe Sinjali do të vazhdojë t’ju mbajë të informuar.

Sinjali – aty ku e vërteta flet para lajmit!

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.

/GazetaSinjali/