Edhe dy ditë pas ngjarjes së rëndë e cila rrezikoi të përfundojë tragjikisht për të riun, Pajtim Gashi, i dyshuari për rastin, Shkumbim Sekiraqa, ende nuk ka rënë në duart e Policisë së Kosovës, raporton Gazeta Sinjali.
Sinjali ka siguruar ekskluzivisht edhe fotografinë me portretin e Sekiraqës, i cili dyshohet se plagosi me armë zjarri Gashin.
Ndryshe, në kuadër të zhvillimit të hetimeve për incidentin e rëndë që ndodhi dy ditë më parë në rrugën ‘Bedri Shala’ në Prishtinë, gjatë ditës së djeshme është bastisur shtëpia e të dyshuarit, Shkumbim Sekiraqa.
Burimet e Gazetës Sinjali brenda Prokurorisë bëjnë me dije se gjatë bastisjes nuk është gjetur asgjë e dyshimtë, teksa as Sekiraqa nuk është hasur në atë lokacion.
Njësitë policore kanë marrë të gjitha veprimet e nevojshme hetimore që ndihmojnë në lokalizimin e vendndodhjes së të riut, si dhe identifikimin e personit të dytë që dyshohet se u përfshi në ngjarjen e rëndë.
Të dyshuarit menjëherë pas rastit janë arratisur nga vendi i ngjarjes me një veturë të tipit ‘Audi’ e kuqe.
Kujtojmë se Shkumbim Sekiraqa rreth 18-vjeçar është djali i Salih Sekiraqës.
Ky i fundit është një nga emrat e njohur për organet e rendit, për shkak të të kaluarës së tij kriminale. Herën e fundit ishte arrestuar nëntorin e vitit të kaluar për armëmbajtje pa leje.
Gazeta Sinjali raportoi po ashtu ekskluzivisht se personi që u plagos me armë zjarri është Pajtim Gashi, i cili dyshohet se fillimisht është sulmuar në kokë e pastaj është qëlluar me armë në këmbë.
Gashi – sipas sinjalizuesve të Sinjalit është anëtar i familjes së njohur si “Capat”.
Ndërkohë tashmë kanë dalë edhe pamjet se si ndodhi rasti, aty shihet se si u riu u rrah dhe me pas u qëllua me armë zjarri.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.