Një sasi e drogës e dyshuar të jetë e llojit kokainë dhe një armë e zjarrit janë gjetur në një veturë të tipit “Golf 7” ngjyrë e bardhë me targa vendore në Prishtinë, raporton Sinjali.
Vetura ishte ndaluar nga zyrtarët e Antidrogës në Prishtinë, ditën e djeshme në rrugën “Fehmi Agani”, rreth orës 19:30, ku dhe hasën në gjëra të dyshimta.
Sinjali mëson se i dyshuari në këtë rast është Indrit Rusinovci ku bashkë me të në veturë ishin edhe dy persona të tjerë.
Detaje për rastin ka dhënë edhe Policia, ku gjatë kontrollit të veturës është kërkuar ndihmë nga njësiti K-9 (njësiti me qen policor), i cila ka dal në vendin e ngjarjes.
I dyshuari me të parë qenin e Policisë ka treguar se në veturë nën mbishtesën e dorës në mes të shoferit dhe pasagjerit ka të fshehur një sasi të kokainës si dhe në dollapin poshtë timonit ka një revole.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.