Një operacion i madh i zhvilluar nga Sektori Qendror për Hetimin e Narkotikëve në Prishtinë ka rezultuar me zbulimin e një sasie të konsiderueshme droge dhe sendeve të tjera të dyshimta në shtëpinë e një personi me të kaluar kriminale.
Burime të Gazetës Sinjali brenda Prokurorisë bëjnë të ditur se mbrëmë rreth orës 20:00, pas një pune intensive operative në terren dhe në bashkëpunim me Prokurorinë e Krimeve të Rënda në Prishtinë, është kryer kontroll në shtëpinë e Agim Rexhepit, 44-vjeçar.
Gjatë kontrollit të realizuar nga antidroga janë sekuestruar: 4.680 gram marihuanë në një qese najloni, 3.880 gram marihuanë në një qese tjetër, 5.34 gram kokainë, një armë zjarri (revole) e tipit “Beretta” cal. 7.65 mm me karikator dhe 15 fishekë, dy peshore digjitale, një telefon “iPhone 14”, një çantë me dokumente në gjuhën turke, 800 euro para të gatshme, 6 ora të dorës të markave të ndryshme, 3 SIM kartela të “Valës” dhe 3 kartela bankare, një pasaportë e Kosovës, 2 DVR (pajisje të regjistrimit të kamerave), dokumente të ndryshme, një veturë e tipit “Škoda”.
Për shkak të hapësirës së madhe të objektit dhe kushteve të errësuara, me urdhër të prokurorit, kontrolli ka vazhduar edhe më 05 maj 2025 për të përfunduar verifikimin e plotë të pronës.
Agim Rexhepi është ndaluar për 48 orë dhe ndaj tij është iniciuar rasti “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
Hetimet pritet të thellohen në ditët në vijim, ndërsa ky rast konsiderohet si një prej kapjeve më të mëdha të muajve të fundit nga Policia e Kosovës.
Detajet ekskluzive:
Sinjali – aty ku e vërteta flet para lajmit!
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.