Një skenë që mund të kishte përfunduar tragjikisht është parandaluar mbrëmë në Ferizaj, ku Policia ka kapur dy persona të armatosur në parkingun e marketit “Viva Fresh Store”, në rrugën “Naim Beka”.
Burime të besueshme nga strukturat e afërta me hetimin bëjnë me dije se ngjarja ka ndodhur më 11 shkurt 2026, rreth orës 20:20, kur njësia e DHTN-Ferizaj ka vërejtur një veturë VW Jetta, ngjyrë e zezë, me targa vendore, të parkuar në mënyrë të dyshimtë.
Gjatë verifikimit, jashtë automjetit janë hasur Leonard Jemini (19 vjeç) dhe Egzon Arifi (25 vjeç).
Kontrolli trupor ka zbuluar se Arifi, i cili ishte shofer i veturës, mbante në xhepin e xhaketës një Spray OC me mbishkrimin “Nato”, ndërsa te Jemini është gjetur një revole e tipit “Zoraki”, bashkë me një fishek kalibri 7.65 mm, të vendosur në karikator.
Të dy janë shoqëruar menjëherë në Stacionin Policor në Ferizaj, ku janë intervistuar nga njësia e hetimeve për veprën penale “Mbajtja në pronësi, kontroll ose posedimi i paautorizuar i armëve”, në prani të avokatëve mbrojtës sipas detyrës zyrtare.
Arma e zjarrit dhe spreji OC janë sekuestruar si prova materiale dhe janë dërguar në dhomën e dëshmive përmes zinxhirit zyrtar të ruajtjes.
Pas konsultimit me Prokurorin e Shtetit, është marrë vendim që Leonard Jemini të dërgohet në ndalim policor për 48 orë në Qendrën e Ndalimit, ndërsa Egzon Arifi është liruar në procedurë të rregullt.
Rasti po vazhdon të trajtohet nga organet kompetente, ndërsa hetimet mbeten në zhvillim.
Sinjali – aty ku e vërteta flet para lajmit!
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.