Një numër i madh i të dyshuarve që kërkohen nga organet e rendit arrijnë ta shijojnë lirinë nga arratia. Plot të akuzuar e të dënuar për vepra të ndryshme penale, që kanë ikur nga duart e drejtësisë, shpallen në kërkim dhe ndaj tyre lëshohen urdhëresa, raporton Gazeta Sinjali.
Së fundmi, Policia në Prishtinë e ka arrestuar një person, ndaj të cilit kishte urdhëresë aktive nga Gjykata Themelore në Prishtinë.
Sinjali ka mësuar ekskluzivisht se bëhet fjalë për Flamur Mehanin, i cili u arrestua në rrugën “Isa Kastrati” në kryeqytet.
I njëjti u ndalua dhe pas verifikimit, rezultoi se po kërkohej nga gjykata, pasi ishte shpallur fajtor dhe ishte dënuar me 4 muaj burgim për një rast të mëhershëm.
Mehani ishte dënuar për veprën penale “Kanosje”.
Pas përfundimit të procedurave policore, i njëjti është dërguar në njërën nga qendrat korrektuese në vend për ta vuajtur dënimin.