Gazeta Sinjali sot raportoi se janë identifikuar edhe tre të dyshuar të tjerë për rrëmbimin e 24-vjeçarit në lagjen Tasligje të Prishtinës, më 16 prill. Pista e hetimeve është zgjeruar, me ç’rast është gjetur në Podujevë automjeti në të cilin u fut i riu në ditën kur u rrëmbye. Personat e tjerë që u zbuluan si të implikuar në rast janë shpallur në kërkim policor bashkë me të dyshuarin tjetër Albin Hoxha.
Burimet e Sinjalit brenda Prokurorisë kanë bërë me dije se tre të dyshuarit e tjerë që u identifikuan pas veprimeve hetimore janë:
Alver Baleri, 50-vjeçar (i cili e ka ndryshuar emrin nga Rafet Hoxha në Alver Baleri), babai i të dyshuarit Albin Hoxha
Meriton Krasniqi, 27-vjeçar,
Agon Krasniqi, 21-vjeçar.
Të gjithë të dyshuarit tashmë janë shpallur në kërkim policor dhe veprimet hetimore janë duke vazhduar në koordinim me Prokurorin, që të njëjtit të kapen dhe të zbardhet e vërteta e rrëmbimit.
Përveç zbulimit të të dyshuarve, Policia ka gjetur edhe veturën me të cilën u rrëmbye viktima. Pas veprimeve të marra nga hetuesit policorë, vetura Golf 7 është lokalizuar në qytetin e Podujevës, ku më pas është konfiskuar me qëllim të ekzaminimit.
Ndërsa dy vajzat e dyshuara, njëra 19 e tjetra 22-vjeç, të cilat kanë vënë në grackë të riun, duke e dorëzuar te rrëmbyesit, sipas burimeve të Sinjalit do të hetohen në procedurë të rregullt nga Prokuroria Themelore në Prishtinë.
Prokurori ka marrë vendim edhe për të dyshuarin e tretë, i cili u vetëdorëzua në Polici. Lion Gashi pasi u mbajt për 48 orë është liruar po ashtu dhe ndaj tij do të kryhen hetimet në procedurë të rregullt.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.