Partitë politike dje zyrtarisht kanë hapur fushatën për zgjedhjet që do të mbahen më 14 shkurt, shkruan Gazeta Sinjali.

Por, partitë politike e kishin filluar jozyrtarisht fushatën e tyre elektorale duke vizituar kështu shumë qytete. Edhe zyrtarisht, më 3 shkurt, fushatën e nisën duke shkelur masat antiCOVID.

Krahas vizitave, pothuajse të gjitha partitë kanë shkelur masat antiCOVID, duke mbledhur qindra njerëz pa mbajtje të maskave dhe mosrespektim të distancës.

Drejtori i Inspektoratit në Prishtinë, Adonis Tahiri ka bërë të ditur se sot është gjobitur me 2 mijë euro Lëvizja Vetëvendosje pasi që nuk janë respektuar masat antiCOVID.

“Askush mbi ligjin! Shkelje e vendimit nr. 09/58 të Qeverisë së Kosovës (dt.14.01.2021), pikat 24 dhe 25, si dhe Ligjit për parandalimin dhe luftimin e pandemisë. 2000 euro gjobë, sipas nenit 25.1 të ligjit në fjalë!”, shkroi Tahiri në Facebook./Gazeta Sinjali/