image Edhe një lagje e Prishtinës bëhet me rrjet nëntokësor

Kosovë

Edhe një lagje e Prishtinës bëhet me rrjet nëntokësor

news image

Në kuadër të planit investiv të Departamentit të Investimeve në KEDS, mbi 100 konsumatorë të lagjes Taslixhe të Prishtinës bëhen me rrjet nëntokësor.

Ky projekt, i cili ka filluar para afro dy vitesh, është në përfundim e sipër dhe kap një shumë prej mbi 100 mijë euro. Tashmë është vendosur një transformator, bashkë me ormanët tokësorë dhe kabllot nëntokësore, si dhe elementet e tjera përcjellëse.

Inxhinieri Fatos Hasolli, udhëheqës për mbikëqyrjen e projekteve të Tensionit të Mesëm në Departamentin e Investimeve, shprehet i kënaqur për realizimin e projekteve moderne që ndikojnë në përmirësimin e furnizimit të qëndrueshëm për konsumatorët tanë.

“Jemi të kënaqur kur puna jonë ndikon në përmirësimin e qëndrueshëm e kualitativ me energji elektrike, në veçanti në ato zona ku gjendja me furnizim ka qenë e rëndë, duke realizuar projekte moderne me shtrirjen e kabllove dhe infrastrukturës së nevojshme nëntokësore”, thotë ai.

Me realizimin e këtij investimi, edhe konsumatorët tanë në këtë lagje shprehen të lumtur, meqë përfitojnë një rrjet elektrik tërësisht të ri, që u mundëson furnizim me energji elektrike sigurt dhe shumë cilësor.

“Që njëzet vjet jetoj në këtë lagje! Ka ndodh që tensionin e kemi pasë jo më të lartë se 105V. Unë jam elektricist dhe e kam matë vetë”, thotë Ridvan Osmani, banor i kësaj lagjeje, duke falënderuar KEDS-in për punën e mirë.

Edhe Milazim Hajrizi, punëtor teknik i shkollës “Iliria” shprehet i kënaqur për rrjetin e ri nëntokësor, dhe falënderon KEDS-in për këtë projekt.

“Falënderojmë KEDS-in që na hoqi shtyllat e telat e na bëri me rrjet të ri nëntokësor”, u shpreh ai.

Në kuadër të planeve investive të KEDS-it, në qendrat kryesore të vendit tashmë janë eliminuar rrjetet ajrore, duke u zëvendësuar me ato nëntokësore.

Aktualisht, në mbarë Kosovën KEDS po realizon mbi 250 projekte të ndryshme kapitale.

/GazetaSinjali/