Viti 2022 po përfundon edhe me një rast tejet tragjik e të dhimbshëm. Një tjetër grua humbi jetën pasi dyshohet se u vra mizorisht nga kunata e saj në Dragash. 67-vjeçarja Sahime Domuzet u rrah për vdekje me mjete të forta nga gruaja e vëllait të saj. Kjo e fundit e ka pranuar se e ka bërë veprën, raporton Gazeta Sinjali.
Sinjali mëson se e dyshuara e ka pranuar veprën të cilën dyshohet se e ka kryer dhe më pas mjetet të cilat i ka përdorur për vrasjen e kunatës i ka fshehur.
Arrestimi i saj është bërë pas intervistimit për herë të dytë, ku para hetusve policorë ka rrëfyer ngjarjen në tërësi.
Gruaja e cila u rrah për vdekje mëngjesin e se hënës nuk arriti t’u bëjë ballë plagëve nga goditjet e forta dhe për pasojë vdiq. Vdekjen e saj e konfirmoi mjeku në vendin e ngjarjes dhe aty nisi të thellohej tragjedia.
Në trupin e të ndjerës ekipi mjekësor gjeti shenja të dhunës, gjë që ngriti dyshimet për rrethanat e vdekjes së saj.
Prokurori i Shtetit u aktizua menjëherë dhe urdhëroi që trupi i pajetë të dërgohet në IML për obduksion, ku edhe u zbuluan detajet tronditëse.
Me rastin e riintervistimit, e dyshuara ka pranuar se i ka fshehur mjetet me të cilat e vrau kunatën dhe të njëjtat tashmë janë sekuseteuar për t’u shfrytëzuar kundër të dyshuarës në procedurë.
E njëjta do të hetohet për veprën penale “Vrasje e rëndë” dhe menjëherë pas përfundimit të procedurave është dërguar në ndalim policor.
Jeta e të ndjerës ka qenë plot vuajtje e mundime që nisën që nga martesa e saj për 15 vjet prej të cilës nuk pati fëmijë, vdekja e bashkëshortit e më pas edhe vdekja e vëllait. Ajo mbeti në duart e kunatës, jo për përkujdesje, por për t’u keqtrajtuar deri në ditën e fundit të jetës së saj.
Tashmë e ndjera, ka jetuar në shtëpinë e vëllait ku dyshohet se ka përjetuar dhunë nga bashkëshortja e tij dhe nipi, ndaj të cilëve javën e kaluar është ngritur aktakuzë për dhunë në familje.