Vetëm dy ditë pasi hodhi në shitje biletat për ndeshjen mes Ballkanit dhe Sivassporit, klubi kosovar tashmë ka shitur të gjitha biletat në dy tribunat kryesore: Lindje dhe Perëndim, ka mësuar Gazeta Sinjali Sport.
‘Portokallinjtë’ do të presin klubin turk Sivasspor në ndeshjen kthyese në “Fadil Vokrri” të enjten e ardhshme, më 13 tetor.
Ndeshja e zhvilluar në Turqi ndaj klubit turk doli të ishte historike për klubin kosovar, pasi e arriti fitoren e parë në grupe të Ligës së Konferencës, diçka që asnjë klub tjetër kosovar nuk e kishte bërë më parë.
Me këtë fitore, klubi suharekas tani ka një shans të mirë për t’i kaluar grupet, ku qëndron lidere e grupit, me pikë të barabarta me të tri skuadrat tjera, por me golaverazh më të mirë të shënimit të golave.
Kjo ka bërë që interesimi të jetë i jashtëzakonshëm për ta parë Ballkanin në “Fadil Vokrri”, ku po e dëshmon edhe shitja e biletave në mënyrë masovike.
Siç mëson Gazeta Sinjali Sport brenda burimeve të klubit, tashmë janë shitur të gjitha biletat në tribunën e lindjes dhe perëndimit, dhe kanë mbetur vetëm pak të mbetura në tribunën e veriut dhe jugut.
Kujtojmë se çmimet e biletave për këtë duel ishin: Veri dhe Jug 2 euro, Lindje 5 euro, Perëndim 10 euro dhe VIP 40 euro (në zonën VIP ku është i përfshirë Cateringu).
