Gazeta Sinjali pak më parë raportoi për një aksident të rëndë në fshatin Sfeqël të Podujevës, ku si pasojë kanë humbur jetën dy persona, ndërsa ka mbetur i lënduar një tjetër.
Tashmë rastin e ka konfirmuar edhe zëdhënësja e Policisë së Kosovës për Rajonin e Prishtinës, Florie Ahmeti, e cila tha për Sinjalin se në aksident është përfshirë vetëm një veturë, teksa vdekjen e viktimave e ka konstatuar ekipi mjekësor në vendin e ngjarjes.
“Sot rreth orës 20:30 në rrugën që lidhë fshatin Sfeqël me fshatin Shajkovc të Podujevës, ka ndodhur një aksident trafiku, ku është përfshirë një veturë. Si pasojë e aksidentit tre persona kanë pësuar lëndime të rënda trupore. Dy nga personat e lënduar nuk kanë arrit të përballojnë plagët e shkaktuara nga aksidenti dhe të njëjtit kanë vdekur. Vdekjen e viktimave e ka konstatuar ekipi mjekësor në vendngjarje. Me hetimin për zbardhjen e shkaqeve të këtij vetaksidenti, po merren hetuesit nga Njësiti i trafikut”, tha Ahmeti.
Ndërkohë, Sinjali ka siguruar pamje nga vendi i ngjarjes, ku shihet se vetura ka dalë jashtë rrugës.
