Në fshatin Pozharan të Vitisë është arrestuar një i dyshuar pasi gjatë bastisjes në shtëpinë e tij dhe objektet përcjellëse janë gjetur dhe konfiskuar 72.8 gram substanca narkotike e llojit heroinë.

Në cilësinë e provave materiale nga i dyshuari janë konfiskuar: 4.715 euro, 20 franga zviceranë dhe 90 dinar të Serbisë. I dyshuari pas intervistimit me vendim të prokurorit është dërguar në mbajtje.

Ndërkohë gjatë 24 orëvë të fundit policia ka konfiskuar në disa lokacione të Kosovës edhe narkotikë të llojit marihuanë. Në tri raste të ndara dy persona janë arrestuar dhe dërguar në mbajtje ndërsa dy të tjerë pas arrestimit janë liruar në procedurë të rregullt.

Në rrugën “Dëshmorët e Hereqit” në Rahovec është arrestuar një i dyshuar pasi gjatë kontrollit në veturën të cilën kishte qenë duke e drejtuar janë gjetur dhe konfiskuar 55 gram substanca narkotike që dyshohet të jetë marihuanë. I dyshuari pas intervistimit me vendim të prokurorit është ndaluar në mbajtje.

Për posedim të narkotikëve janë arrestuar edhe dy të dyshuar meshkuj në  rrugën  “Agim Ramadani” në Mitrovicë pasi që gjatë kontrollimit të veturës me të cilën kishin udhëtuar dhe në shtëpinë e njërit prej tyre  janë gjetur dhe konfiskuar 14.93 gram substanca të dyshuara narkotike e llojit marihuanë. Pas intervistimit me vendim të prokurorit njëri prej të dyshuarve është dërguar në mbajtje kurse tjetri është liruar në procedurë të rregullt.  

Ndërsa në rrugën “Fazli Grajqevci” në Prishtinë mbrëmë është arrestuar i dyshuari mashkull pasi gjatë kontrollit tek i njëjti është gjetur dhe konfiskuar 5.3 gram substanca narkotike të dyshuara si marihuanë. I dyshuari pas intervistimit me vendim të prokurorit lirohet në procedurë të rregullt./Sinjali/