Gazeta Sinjali pak më parë raportoi për një incident zjarri që ka ndodhur në orët e para të mëngjesit të sotëm në hotelin ‘Jeta’ në Gjakovë. Nuk raportohet për persona të lënduar, mirëpo janë shkaktuar dëme të konsiderueshme materiale.
Sinjali mëson se në vendin e ngjarjes kishin dalë menjëherë njësitë policore dhe zjarrfikësit, të cilët kanë evakuuar personat të cilët ishin të akomoduar në hotel. Ndërkohë zjarri është lokalizuar dhe është fikur nga zjarrfikësit.
Momentalisht nuk dihen ende rrethanat se si ka ndodhur në tërësi ngjarja e as çka ka shkaktuar zjarrin.
Rastin për Sinjalin e ka konfirmuar edhe zëdhënësi i Policisë së Kosovës për rajonin e Gjakovës, Sheremet Elezaj.
“Rreth orës 04:45 një dhomë e Hotelit “Jeta” në rrugën “Dëshmorët e Heteqit” ishte përfshirë nga zjarri. Zjarrfikësit kanë reaguar në rast dhe kanë arritur të lokalizojnë zjarrin. Po ashtu njësitet relevante të policisë ju janë përgjigjur rastit dhe është iniciuar rast hetimi “Zjarrvenje”. Përveç dëmeve materiale, pasoja në njerëz nuk ka pasur”, tha Elezaj.