Zyra e Rregullatorit i ka njoftuar palët ndërmjetësuese se pas licencimit të kompanisë serbe “Elektrosever” nuk është përmbushur asnjë nga pikat e udhërrëfyesit, i cili duhet të zbatohej në një periudhë 100-ditëshe.
“Përveç pikës së parë që ka të bëjë me lëshimin e licencës për furnizim në kuadër të udhërrëfyesit, asnjë prej pikave tjera nuk janë plotësuar deri më tani”, tha Ymer Fejzullahu, kryesues i Bordit të ZRRE-së.
Fejzullahu tha për RTK-në se me marrëveshje për udhërrëfyesin, i takon Bordit të ZRRE-së ta shqyrtojë licencën për operatorin “Elektorsever” në një periudhë 15 ditore.
“Pas konsultimit me palë tjera, në rast se nuk plotësohen kriteret e përmendura në udhërrëfyes, ZRRE-ja do t’ia tërheqë licencën, kjo është e përmendur në udhërrëfyes e po ashtu është edhe në kuadër të vendimit të ZRRE-së për dhënien e licencës për ‘Elektroserverin’”, shtoi Fejzullahu.
Kosova dhe Serbia për të tretën herë u pajtuan për zbatimin e Marrëveshjes për Energjinë, por një gjë e tillë u pengua nga vetë shteti serb.
Udhërrëfyesi parashikonte që brenda një periudhë 100 ditore të përmbusheshin nëntë pika.
Dy ditë pas kësaj ujdie, Zyra e Rregullatorit brenda dy ditësh e licencoi kompaninë serbe “Elektrosever”, e cila nuk përmbushi asnjë nga pikat që parashiheshin në udhërrëfyes.
