image Dërgohen dy pako në vlerë prej 125 euro në Hagë - Sinjali

Dërgohen dy pako në vlerë prej 125 euro në Hagë

news image

Një pako nga familjarët e Jakup Krasniqit e një nga familjarët e Rexhep Selimit janë dërguar deri më tani në Hagë.

Më 16 dhe 17 korrik u shënuan vizitat e para nga familjarët te të akuzuarit në Hagë.

Pas tetë muajsh, familjarët e Jakup Krasniqit dhe ata të Rexhep Selimit patën mundësinë që t’i takojnë nga afër më të dashurit e tyre.

Pos këtyre vizitave, këto dy familje tani kanë dërguar edhe pako te të akuzuarit në Hagë.

Këto dërgesa u mundësuan nga Ministria e Drejtësisë, e të cilat i kushtuan 125 euro buxhetit të këtij dikasteri.

“Ju njoftojmë se deri me tani kemi pasur dy kërkesa për dërgimin e pakove, nga familja e Jakup Krasniqit dhe familja e Rexhep Selimit. Janë dërguar në mënyrë individuale dy dërgesa ( vlera 125 Euro ), Ministria e Drejtësisë ende nuk ka kontraktuar asnjë kompani në mënyrë afat gjatë me kontratë”, thuhet në përgjigjen e kësaj ministrie për T7.

Ky ndërmjetësim mes familjarëve e të akuzuarve në Hagë po shihet si një veprim i vullnetit të mirë nga ana e Ministrisë së Drejtësisë.

Kjo pasi që, sipas avokatit, Artan Çerkini, ka qenë obligim i Gjykatës Speciale e jo i ministrisë.

Sipas Çerkinit, një ballafaqim në mes të ministrisë e Speciales nuk do t’i konvenonte askujt.

E që më së shumti nga një polemikë e tillë do të pësonin ata që ndodhen në paraburgim.

Ministria e Drejtësisë përveç mbulimit të dërgimit të pakove, e vizitave të familjarëve, mbulon edhe pagesat e avokatëve mbrojtës./Gazeta Sinjali/


Shpërndaje artikullin