Stomatologu gjerman Christian B. do të dalë para një gjykatësi në Antalia të martën, pasi ka qenë në paraburgim për një muaj për shkak të një grindje me një grua turke në aeroport, e cila e akuzoi për fyerjen e presidentit Recep Tayyip Erdogan, shkruan Gazeta Sinjali.

63-vjeçari zbarkoi në aeroportin e Antalias në fillim të nëntorit duke synuar të kalonte disa ditë në diellin turk, por ai u grind me një grua. Ekzistojnë dy versione të rrjedhës së grindjes.

Gjermani thotë se ndërsa priste bagazhet në shiritin transportues, ai vetëm e paralajmëroi gruan që të mbante distancën e rekomanduar në kohën e koronavirusit dhe se ajo më pas shkoi për të marrë policinë. Gruaja pretendon se Christian B. e mallkoi me zë të lartë atë, turqit si komb dhe presidentin Erdogan.

Një akuzë për fyerje të presidentit mund të jetë e rrezikshme, pasi Kodi Penal parashikon dënim një deri katër vjet me burg.

Vetëm vitin e kaluar, një hetim nisi në 36 mijë raste për ‘fyerjen e presidentit’, një e treta e të cilave shkoi në gjykatë dhe rreth 4 mijë njerëz u dënuan me gjobë ose burgim. /Gazeta Sinjali/