Ministri i Brendshëm i Serbisë, Ivica Daçiq, i është përgjigjur kërkesës së Kosovës për ekstradimin e terroristit, Milan Radoiçiq.
Të entjen para gazetarëve, Daçiq tha se Serbia nuk ka marrëdhënie të drejtpërdrejta me Kosovën, dhe për këtë arsye është e pamundur të merret parasysh kërkesa për ekstradim.
“Nuk e di nëse e kuptoni se Serbia nuk e njeh Kosovën si shtet të pavarur dhe kjo është absolutisht e pamundur. Ne nuk kemi marrëdhënie të drejtpërdrejta me përfaqësuesit e Kosovës. Çdo gjë që bëjmë, e bëjmë me EULEX-in dhe kështu kemi marrë dhe kemi kërkuar formularë për atë proces. Asnjë ekstradim brenda Serbisë nuk është i mundur”, tha Daçiq.
Radoiçiq mori përgjegjësinë për sulmin e 24 shtatorit në Banjskë të Zveçanit, ku grupe të armatosura serbësh sulmuan policinë e Kosovës, duke vrarë rreshterin Afrim Bunjaku.
Në përleshjet e armatosura që pasuan, u vranë edhe tre sulmues serbë.
Përmes një letre publike të lexuar nga avokati i tij më 29 shtator të 2023-ës, Radoiçiq tha se “personalisht” e ka organizuar rebelimin e armatosur në veri të Kosovës.
Ai e mohoi përgjegjësinë e autoriteteve shtetërore të Serbisë në këtë sulm.
Radoiçiq, ish-nënkryetar i Listës Serbe në Kosovë, u mor në pyetje nga Prokuroria e Serbisë në muajin tetor dhe u ngarkua me disa vepra, përfshirë trafikim armësh dhe shkaktim të rrezikut të përgjithshëm.
Megjithatë, gjykata në Beograd e liroi nga paraburgimi, por ia konfiskoi dokumentet.
Autoritetet e Kosovës bënë përgjegjëse udhëheqjen shtetërore të Serbisë për sulmin që nxiti shqetësime për qëndrueshmërinë në rajon, ndërsa Serbia e mohoi përfshirjen dhe drejtoi gishtin kah serbët e Kosovës.
INTERPOL-i ka lëshuar urdhër për arrestimin e Radoiçiqit.