Një çift i ri në provincën Aceh të Indonezisë është ndëshkuar publikisht pasi një gjykatë e sheriatit i shpalli fajtorë për shkelje të ligjit islamik, pas një videoje ku ata shiheshin duke u puthur gjatë një transmetimi të drejtpërdrejtë në TikTok.
Sipas vendimit të gjykatës, burri 22-vjeçar dhe gruaja 25-vjeçare u dënuan me nga 21 goditje me kamzhik secili, ndëshkim që u realizua publikisht në Parkun Bustanussalatin në qytetin Banda Aceh, para të paktën njëqind personave.
Çifti fillimisht ishte dënuar me nga 25 goditje, por dënimi u ul pasi ata kishin kaluar katër muaj në paraburgim. Gjykata gjithashtu urdhëroi konfiskimin dhe shkatërrimin e pajisjeve që përmbanin videon e transmetuar në TikTok.
Rasti ka nxitur reagime të ndryshme. Organizata Amnesty International e ka dënuar ndëshkimin, duke e cilësuar si shkelje të të drejtave të njeriut dhe si një formë ndëshkimi mizor dhe poshtërues.
Ndërkohë, disa banorë lokalë kanë mbështetur vendimin, duke thënë se ndëshkimi publik shërben si paralajmërim për sjelljet në publik dhe përdorimin e rrjeteve sociale.
Aceh mbetet e vetmja provincë në Indonezi që zbaton ligjin e sheriatit, ku ndëshkimet publike përdoren për një sërë shkeljesh morale dhe ligjore.
Sinjali – aty ku e vërteta flet para lajmit!