Çatia e përdorur nga personi i armatosur për të qëlluar ndaj Donald Trump u identifikua si një dobësi e mundshme e sigurisë në ditët para se ish-presidenti të fliste në një tubim, raporton rrjeti partner i Sky NBC News.
Dy burime i kanë thënë NBC-së se çatia u pa si një pikë e dobët e mundshme nga Shërbimi Sekret, i cili mbron presidentët amerikanë dhe ish-presidentët.
Ndërtesa, në pronësi të një kompanie kërkimore xhami, është ngjitur me Butler Farm Show, një vend në natyrë në Butler, Pensilvani.
“Dikush duhet të kishte qenë në çati ose të siguronte ndërtesën në mënyrë që askush të mos mund të hipte në çati,” tha një nga burimet, një ish-agjent i lartë i Shërbimit Sekret që ishte i njohur me planifikimin.
Të kuptuarit sesi i armatosuri u ngjit në çati – pavarësisht këtyre shqetësimeve – është një pyetje qendrore për hetuesit që shqyrtojnë se si një sulmues i vetëm arriti të qëllonte ndaj Trump gjatë ngjarjes së fushatës të së shtunës.
Shërbimi Sekret punoi me policinë lokale për të ruajtur sigurinë e ngjarjeve, duke përfshirë ekipe snajperësh të vendosur në çati për të identifikuar dhe eliminuar kërcënimet, tha zëdhënësi i Shërbimit Sekret Anthony Guglielmi.
Por asnjë oficer nuk u vendos në ndërtesën e përdorur nga vrasësi i mundshëm, jashtë unazës së sigurisë së ngjarjes, por vetëm rreth 148 metra larg skenës – brenda rrezes së një pushke gjysmë automatike si ajo që mbante i armatosuri.