Janë zbardhur detaje të reja lidhur me ngjarjen që tronditi kryeqytetin e Shqipërisë, Tiranën një ditë më parë, teksa u qëllua me plumb në kokë në “Myslym Shyri” 26-vjeçarin Indrit Çelaj, i cili ndërroi jetë sot në Spitalin e Traumës.

Gazetarja “BalkanWeb” sjell pamje nga kati i parë i vilës, ku ndodhi gjithçka, teksa shihet ambienti në të cilin punonte i riu dhe mjetet e punës. Shkak i krimit dyshohet të ketë qenë një konflikt i çastit, i cili ka nisur me një përplasje verbale mes viktimës dhe dy vëllezërve, që ishin djemtë e pronarit të vilës, duke bërë që këta të fundit të nxjerrin armën dhe të qëllojnë mbi punëtorin e tyre.

Si autorët e krimit, ashtu edhe viktima, nuk rezultojnë me precedentë penalë dhe nuk janë persona të skeduar nga policia. Ndërkohë, pas ngjarjes vëllezërit i kanë kërkuar shokut të tyre, Lorenc Veliaj, ta marrë përsipër krimin, pasi ky i fundit ishte person me precedentë penalë.

26-vjeçari ishte nga Mallakastra, por prej kohësh ishte zhvendosur me banim në Tiranë, ku punonte në fushën e kondicionimit të ambienteve, prej disa vitesh.