Malcolm Simmons dhe Charles Smith për një kohë të gjatë ishin kolegë në misionin e EULEX-it në Kosovë, madje Simmons këtë të fundit e kishte edhe epror, transmeton Gazeta Sinjali.
Kurse tani pas më shumë se 6 vjetësh, Simmons e Smith do të takohen sërish bashkë, por këtë herë në një betejë ku do të jenë kundërshtar me njëri tjetrin.
Malcolm Simmons është propozuar si dëshmitar i mbrojtjes në rastin e Hysni Gucatit e Nasim Haradinajt në Gjykatën Speciale. E pikërisht në këtë rast, kryetar i trupit gjykues ishte caktuar kohë më parë Charles Smith.
Këtë të fundit, Simmons e akuzon se si kryetar i asamblesë së gjyqtarëve të EULEX-it në vitin 2013, ndërhynte në proceset gjyqësore për arsye politike, duke bërë presion te gjyqtarët.
Këto pretendime, avokatët e Nasim Haradinajt i shfrytëzuan që Simmonsin ta propozojnë si dëshmitar, e në anën tjetër duke kërkuar përjashtimin e Charles Smith nga ky rast.
Mirëpo, nëse çdo gjë shkon sipas planit, ballafaqimi Simmons-Smith do të jetë i pashmangshëm.
Por, si mund të përshkruhet ky rast në aspektin juridik?
“Këto janë gjëra që mund të ndodhin sepse janë të një fushe, dhe secili e zhvillon karrierën herë avokatë, herë prokuror, herë gjyqtar. Dhe mund të ndodhë të ballafaqohesh me kolegët e tu në kapacitete të ndryshme”, ka thënë Taulant Hodaj për RTK-në.
Megjithatë, ekziston mundësia që Malcolm Simmonsit t’i refuzohet statusi i dëshmitarit.
“Duhet të shikohet nëse ka konflikt interesi, dhe nëse ekziston një gjë e tillë atëherë mund të kërkohet përjashtimi i ndonjërit”, shton Hodaj.
Për përfshirjen e Charles Smith në skandalet e EULEX-it, Malcolm Simmons raportoi në Kuvendin e Kosovës javë më parë.
Të gjitha këto ai ka thënë se është i gatshëm t’i thotë edhe para Dhomave të Specializuara si dëshmitar në rastin Gucati-Haradinaj.
