Qyteti Duran në Ekuador është kthyer në një nga zonat më problematike të vendit për shkak të rritjes së ndikimit të bandave kriminale dhe përhapjes së trafikut ndërkombëtar të drogës.
Në një reportazh të publikuar nga BBC, autoritetet ekuadoriane kanë ngritur shqetësime për përfshirjen e personave të korruptuar brenda institucioneve, të cilët dyshohet se u ndihmojnë grupeve kriminale të shmangin goditjet e drejtësisë.
Ekuadori konsiderohet tashmë një pikë e rëndësishme tranziti për trafikun e kokainës drejt Evropës dhe Shteteve të Bashkuara, ndërsa bandat lokale dyshohet se kanë krijuar bashkëpunime me rrjete ndërkombëtare të krimit të organizuar, përfshirë edhe grupe të lidhura me mafian shqiptare.
Dhuna në vend është rritur ndjeshëm vitet e fundit, ndërsa autoritetet kanë ndërmarrë operacione të vazhdueshme kundër bandave. Megjithatë, këto përpjekje kanë çuar edhe në fragmentimin e disa grupeve kriminale në organizata më të vogla dhe më të dhunshme.
Policia ekuadoriane thekson se përveç luftës ndaj trafikut të drogës, një nga sfidat kryesore mbetet korrupsioni, pasi disa persona të përfshirë në rrjete kriminale arrijnë të ndikojnë në procese ligjore përmes ryshfeteve.
Raporti i BBC-së thekson gjithashtu se bandat kanë zgjeruar ndikimin e tyre te të rinjtë, duke nxitur shqetësime për rekrutimin e fëmijëve në aktivitete kriminale.
Sinjali – aty ku e vërteta flet para lajmit!