Juventusi ka intensifikuar punën për rindërtimin e repartit ofensiv para sezonit të ri, teksa largimi i pritshëm i Dusan Vlahovicit ka shtyrë drejtuesit e klubit të dalin në treg për dy emra të njohur të futbollit evropian.
Sipas Tuttomercatoweb, në krye të listës së “bardhezinjve” janë Alexander Sorloth i Atletico Madridit dhe Randal Kolo Muani i Paris Saint-Germainit, të cilët po konsiderohen si përforcime kyçe për sulmin e Juventusit.
Për Sorloth, raportimet bëjnë të ditur se Juventusi ka nisur tashmë hapa konkretë në negociata, ndërsa sulmuesi norvegjez thuhet se ka dhënë pëlqimin paraprak për një kontratë katërvjeçare me pagë rreth katër milionë euro në sezon. Megjithatë, marrëveshja me Atletico Madridin mbetet ende e hapur, me klubin spanjoll që kërkon mbi 30 milionë euro për kartonin e 29-vjeçarit.
Në anën tjetër, në lojë mbetet edhe Randal Kolo Muani, i cili më herët ka lënë përshtypje pozitive gjatë periudhës së tij në Torino, ku kishte realizuar 10 gola në 22 ndeshje. Pas huazimit te Tottenhami në sezonin 2025/26, francezi është sërish i disponueshëm në treg, ndërsa PSG është e gatshme ta shesë për rreth 40 milionë euro, me mundësi edhe të formulave më fleksibile të pagesës.
Sipas mediave italiane, nevoja e Juventusit për përforcime në sulm është rritur pas dështimit të bisedimeve për rinovimin e kontratës së Vlahovicit. Sulmuesi serb pritet të largohet nga Juventusi në fund të muajit qershor, duke i dhënë fund aventurës së tij në Torino, pasi palët nuk kanë arritur marrëveshje për vazhdimin e bashkëpunimit.
Sinjali – aty ku e vërteta flet para lajmit!