image Banka Botërore i thotë jo tërheqjes së Trustit
[wp-story id="814678"]

Financa

Banka Botërore i thotë jo tërheqjes së Trustit

news image

Kryeministri i Republikës së Kosovës, Albin Kurti, i shoqëruar nga Ministri i Financave, Punës dhe Transfereve, Hekuran Murati, pritën sot në takim zëvendës presidenten e Bankës Botërore për Evropën dhe Azinë Qendrore, Anna Bjerde, drejtoreshën rajonale të Bankës Botërore për Ballkanin Perëndimor, Linda van Gelder, drejtoreshën e re rajonale për Ballkanin Perëndimor, Xiaoqing Yu, si dhe Menaxherin e zyrës së Bankës Botërore për Kosovë, Massimiliano Paolucci, raporton Gazeta Sinjali.

U bisedua për stabilitetin institucional dhe indikatorët pozitivë. Kryeministri veçoi rritjen e eksporteve dhe potencialin e madh në fushën e teknologjisë së informacionit si dhe angazhimin e qeverisë për digjitalizim. Bjerde e përgëzoi Qeverinë për rritjen ekonomike që sipas tij ishte ndër më të lartat në rajon.

Përfaqësuesit e Bankës Botërore thanë se presin që së shpejti të kalojë në kuvend marrëveshja për reformën sociale, sepse ajo është përgjigja e duhur ndaj krizës së inflacionit dhe jo prekja e mjeteve të trustit pensional.

Si përparësi e pasuri e Kosovës u theksua kapitali njerëzor, prandaj Qeveria sipas njoftimit është fokusuar te investimet në fëmijërinë e hershme, në kopshte e parashkollorë. Në takim u fol për rëndësinë që ka arsimimi profesional në parandalimin e migrimit të të rinjve.

Kryeministri Kurti shprehu mirënjohjen e Qeverisë së Republikës së Kosovës për mbështetjen e Bankës Botërore për Kosovën në shumë fusha. Ai veçoi projektin për përballjen me pandeminë Covid-19.

/GazetaSinjali/