Institucioni i Avokatit të Popullit ka konstatuar se Rregullorja e nxjerrë nga Administrata Tatimore e Kosovës për riorganizimin e brendshëm dhe sistematizimin e vendeve të punës në këtë institucion është e kundërligjshme dhe diskriminuese.
Sipas Avokatit të Popullit, ATK ka bërë diskriminim ndaj dy zyrtarëve të lartë të saj, Hamdi Hoxhës dhe Florim Kurtishajt.
Këto përfundime erdhën pas trajtimit të ankesave të këtyre dy zyrtarëve. Hamdi Hoxha dhe Florim Kurtishaj ishin ankuar tek Avokati i Popullit me pretendimet se ishin diskriminuar nga ATK në momentin kur ishin degraduar në pozita të punës në bazë të Rregullores për riorganizimin e ATK-së.
Më 13 qershor të vitit 2019, me vendim të drejtorit të përgjithshëm të ATK-së, Ilir Murtezaj, zëvendësdrejtori Hamdi Hoxha ishte caktuar në pozitën e udhëheqësit të Divizionit ndërsa drejtori i Departamentit të Lojërave të Fatit, Florim Kurtishaj, ishte caktuar në pozitën e udhëheqësit të ekipit të mbledhjes.
Sipas ATK-së kjo ishte bërë pasi pozitat e këtyre dy zyrtarëve ishin shuar në bazë të Rregullores së re për organizimin e brendshëm të ATK-së dhe se në ketë institucion nuk kishte pozita ekuivalente dhe me qëllim që të njëjtit të mos dërgoheshin si punëtorë tepricë ishin caktuar në pozita me të ulëta në mënyrë që të mos e humbnin statusin e zyrtarit të ATK-së.
Megjithatë sipas Ligjit mbi Shërbyesit Civilë, një zyrtar mund të transferohet në një pozitë tjetër për ushtrimin e funksioneve të njëjta, në të njëjtën kategori funksionale dhe në të njëjtën gradë.
Por në rastin konkret, sipas Avokatit të Popullit, ATK nuk e ka respektuar këtë ligj pasi përpos që ua ka ndërruar pozitën ua ka ulur edhe gradat këtyre dy ankuesve.
Sa i përket arsyetimit të ATK-së se nuk ka pasur pozita ekuivalente të lira por sipas Avokatit të Popullit kjo nuk qëndron pasi më 5 qershor kishte shpallur konkurs për përzgjedhjen e 3 zëvendësdrejtorëve të përgjithshëm.
“Më 5 qershor 2019, ATK-ja ka shpallur konkurs per vende te lira pune për tri pozita të zëvendësdrejtorëve të përgjithshëm. Sipas pohimeve të ankuesve, më 10 qershor 2019, ATK-ja i ka emëruar ushtrues detyre disa drejtorë, duke mos i sistemuar drejtorët e deritanishëm, të cilet i ka konsideruar si punëtorë tepricë, përfshirë edhe ankuesit”, thuhet në mendimin juridik të Avokatit të Popullit drejtuar Gjykatës Themelore në Prishtinë.
Ricaktimi i këtyre dy zyrtarëve në pozita më të ulëta në punë, sipas IAP-it, përbën akt diskriminues pasi në ATK kishte pozita ekuivalente dhe se në to ishin caktuar si ushtrues detyre disa zyrtarë të tjerë.
“ATK emëroi ushtrues detyre disa drejtorë të tjerë duke mos i sistemuar drejtorët e deritanishëm të cilët i konsideroi punëtorë tepricë, dhe një praktikë e tillë përbën diskriminim pasi ankuesit janë trajtuar ndryshe nga ATK-ja, pasi nuk janë caktuar në pozitat ekuivalente”, thuhet në këtë vendim.
Kjo rregullore ishte miratuar më 17 maj 2019.
Por , sipas Ligjit për Organizimin dhe Funksionimin e Administratë s Shtetërore dhe të Agjencive të Pavarura përcakton : “Organizimi i brendshem i ministrive dhe agjencive ekzekutive miratohet me akt nënligjor nga Kryeministri në bazë të propozimit të ministrit përgjegjë-s dhe miratimit paraprak të ministrit përgjegjes për administraten publike dhe opinionit të ministrit përgjegjës për financat. “; dhe përcakton: “Qeveria e Kosoves sipas propozimit të ministrit përgjegjes për administratën publike miraton Rregulloren për standardet të organizimit të brendshëm të institucioneve të administratës shtetërore, procedurat e detajuara për përgatitjen, propozimin, konsultimin dhe miratimin e organizimit të brendshëm si dhe përmbajtjen e memorandumit shpjegues të propozimit. “
Avokati i Popullit konstaton se ATK-ja ka dështuar të ofrojë prova bindëse se me riorganizimin e ri të ATK-së në përputhje me Rregulloren e Brendshme të miratuar në maj, ankuesit janë trajtuar pa diskriminim dhe në përputhje me legjislacionin në fuqi. /GazetaSinjali/