Ramiz Kelmendi mban rekordin si njeriu që ka ndërruar më së shumti parti në një kohë shumë të shkurtër. Për dy vjet, ai kishte kaluar nëpër tri parti politike.

Para 9 vitesh, në nëntor të vitit 2010, dega e AAK-së në Pejë kishte befasuar të gjithë kur publikoi listën e të nominuarve për deputetë nga ky rajon. Në listë gjendej edhe emri i biznesmenit Ramiz Kelmendi, një emër aso kohe krejtësisht i panjohur në politikë, shkruan Sinjali.

Sidoqoftë, ai kishte arritur të bëhej edhe deputet i AAK-së në Kuvendin e Kosovës. Kelmendi besonte fuqishëm se lideri i AAK-së do të ishte kryeministër i vendit. Megjithatë, ai nuk kishte durim të priste deri në vitin 2017, kur Ramush Haradinaj u bë kryeministër.

Më 5 maj të vitit 2014, Kelmendi kishte dhënë dorëheqje nga AAK-ja duke e akuzuar këtë parti se “planin për zhvillim ekonomik, AAK-ja nuk di ta nisë, e lëre më të zbatojë”.

Nuk vonoi shumë dhe pesë ditë më vonë, më 10 maj 2014, Kelmendi aderoi në një parti tjetër. U bë pjesë e PDK-së së Hashim Thaçit, që aso kohe ishte kryeministër në detyrë. Sapo kishte aderuar në partinë e Thaçit, Kelmendi tha se ka parë që në këtë parti do ta realizonte ‘planin e tij ambicioz për zhvillim ekonomik dhe krijim të vendeve të reja të punës’.

E Thaçi, që e kishte pritur në Kelmendin në PDK u bë president, ndërsa kryetari i ri i PDK-së, Kadri Veseli si duket nuk i dha ndonjë shpresë për ta realizuar planin e tij. Kjo bëri që Kelmendi të largohet edhe nga PDK-ja.

“Dorëheqja ime vie pasi që vizioni im për zhvillim ekonomik të Kosovës mu pamundësua”, kishte deklaruar Kelmendi pas dorëheqjes.

Edhe pas rreth dy vitesh pritjeje, Kelmendit nuk i kishte humbur shpresa për ‘realizimin e planit për zhvillimin ekonimik’. Tani atë e kërkonte te partia e Isa Mustafës, kur lideri i LDK-së mbante postin e shefit të qeverisë.

Më 25 tetor të vitit 2016, Kelmendi aderoi në Lidhjen Demokratike të Kosovës. Por as në LDK nuk e gjeti atë që kërkonte për 3 vjet, deri ditën e sotme kur njoftoi largimin nga kjo parti.

Kelmendi thotë se kishte kërkuar nga Mustafa që të sqarohet pozita e tij politike brenda qeverisë “për të përmbyllur vizionin për të ndihmuar zhvillimin ekonomik të Kosovës shumë të domosdoshëm”.

Edhe pas largimit nga LDK-ja, Kelmendi nuk do ta ndalë aventurën e tij me partitë politike. Kështu paralajmëroi edhe në njoftimin e tij për largimin nga LDK-ja.

“Unë me të drejtë kam kërkuar pozicionin tim nga vetë kryetari akademik Mustafa dhe nga bisedat e datës 05.09.2019 kemi arritur pajtueshmëri që rrugët e përbashkëta me LDK-në të ndahen, në mënyrë që unë të kem mundësi për të kërkuar partinë politike e cila më ofron mundësi dhe kushte që t’i realizoj dhe përmbushë vizionet e mia”, shkroi Kelmendi. /Sinjali